BINTULU: Kaban Parti Pesaka Bumiputera Bersatu (PBB) pampang Kakus dilalau tauka dipinta mantu ngambi pulai baru Parlimen Selangau ba pengawa bepilih besai (PRU) ti dipelaba ulih diatur sebarang maya ba taun tu.
Sapit Presiden PBB Datuk Amar Douglas Uggah Embas madahka PBB pampang Kakus sereta parti komponen Gabungan Parti Sarawak (GPS) ke bukai patut nyaup Parti Rakyat Sarawak (PRS) ngambika ulih menang tauka ngambi pulai baru sitak parlimen nya.
“Aku minta semua kaban PBB enggau kaban parti komponen ke bukai meri sukung penuh ngagai PRS ngambika menang baru ba sitak tu (Parlimen Selangau).
“Aram kitai ngiar ke tisi bida mit ke bisi nyadi. Aram kitai beserakup dalam misyen besai kitai tu,” ku iya nyebut pekara tu lebuh bejadi Mesyuarat Perwakilan Tiga Tahun Sekali, PBB Pampang Kakus ditu kemari.
Sitak Parlimen Selangau ti tebal agi Iban ari menua pesisir, mujur dimenang ulih pengari rayat Baru Bian maya iya agi dalam PKR, sereta diatu masuk parti penyakal menua tu, Parti Sarawak Bersatu.
Ku Uggah, raban bansa di Selangau diatu betapi enggau penusah lebuh sida deka begunaka pemansang, ti ketegal pengilap diri empu.
“Aram kitai mantu GPS ngambika ulih menang baru ba sitak tu kena mantu sida ditu,” ku iya.
Bekaul enggau PBB, Uggah ngingkatka semua kaban parti tu iya nya dunya jemah ila betapi enggau pemar lebih agi enggau pemisi pemansang dalam teknologi baka sambung tauka bungkur internet.
Ku iya madah, sekeda orang sanggup ngena teknologi menghentam pemesai, perintah enggau PBB empu.
“Tang PBB kenyau ari taun 1974, udah ngerembai ari pengering ngagai pengering ketegal penyerakup enggau disiplin kaban dalam parti.
“’Anai-anai’ ke nguji deka ngeruga enda ulih laban parti tu tegap tauka kering baka kayu ‘tapang’. Iya udah sereta nyadi tulang belakang perintah negeri.
“Kitai mesti ngetanka penyerakup kitai awakka perintah kitai terus tegap,” ku iya.
Kelimpah ari nya Uggah madah diri gaga ati enggau penetap runding ngambika penuduk presiden PBB enda dipelabanka maya aum besai Perwakilan Tiga Taun Sekali parti ti diatur dalam bulan Jun ke deka datai.
Sama nyempulang Uggah, Senator Daruk Dr Nuing Jeluing sereta Sekretari Politik ngagai Premier Sarawak Dr Richard Rapu enggau Petrus Igat Mathious.