Anda di sini

PUSAKA deka mekuh ngagai industri ngangkatka pemanah produk ti meri rega ke tinggi

Advertisement
Awang Tengah (tiga kanan) nyuaka pemeri ari PUSAKA ngagai siku ari penerima maya program nya. - Gambar Muhammad Rais  Sanusi
Awang Tengah (tiga kanan) nyuaka pemeri ari PUSAKA ngagai siku ari penerima maya program nya. - Gambar Muhammad Rais Sanusi

KUCHING: Opis Pemansang Industri Kayu Sarawak (PUSAKA) deka mantu industri kayu mulaika pemanah enggau mekuh ngagai industri ngangkatka pemanah ti meri rega ke tinggi.

Sapit Premier Sarawak Datuk Amar Awang Tengah Ali Hasan madah, industri kayu mega enda tinggal sereta sama tekeruga ketegal pandemik COVID-19.

Beserimbai enggau tu, iya ngarapka industri kayu deka pulai manah baru enggau mekuh ngagai industri ti nangkanka nya baka ngasilka jemari tauka kerebah berumah sereta 'engineered wood'.

“Baka di Vietnam, sida nadai agi eksport kayu batang tang udah bekaul dalam industri ti nangkanka nya ke alai diatu majak ngerembai kelebih agi dalam pengawa ngasilka jemari tauka kereban berumah ke bukai.

“Nya alai kitai ditu, PUSAKA deka terus ngiring ngembing ngambika sektor peribit ti bekaul dalam industri kayu sama ngasilka produk ti udah tembu ke ngembuan rega ti tinggi,” ku iya.

Iya madah munyi nya lebuh ti bejaku ba Pengerami Nyuaka Pemeri PUSAKA enggau Anak Kompeni 2022 di Dewan Licha PUSAKA, Wisma Sumber Alam ditu, kemari.

Awang Tengah ti mega Menteri Pengeraja Asal enggau Pemansang Mengeri II madah, dalam ngenegapka industri ti ngasilka produk bukai sereta ngaga jemari tauka kereban berumah, PUSAKA deka bekerejasama enggau raban industri ngemansangka Taman Perabot di Kuching enggau Tanjung Manis.

PUSAKA mega ku iya, deka begulai enggau institusyen pelajar tinggi dalam pengawa mansik enggau pemansang (R&D) ungkup ladang kampung, buluh enggau spesies di menua tu.

Pia mega, ku iya, PUSAKA deka neruska aktiviti tanggungpengawa rama korporat (CSR) ngagai komuniti nengah pemeri ngagai gerempung pengasih.

Bejaku bekaul enggau pemeri nya, tu iya nya CSR PUSAKA kenyau ari taun 1982 nyentukka diatu.

Bisi 62 gerempung pengintu pengelantang pendiau, gerempung pengasih, jalai pengarap enggau pelajar udah nerima pemeri ari PUSAKA enggau ungkus sepenyampau RM286,000.

Sama bisi iya nya Menijer Besai PUSAKA Datu Hashim Bojet enggau komiti pengatur PUSAKA ke bukai.
 

Advertisement