KUCHING: Penembu bengunan tauka palan Disleksia ti baru dalam timpuh dua taun ke deka datai, dipelaba ulih nyadika teladan ngagai gerempung disleksia bukai di serata Malaysia.
Menteri Pemansang Orang Indu, Nembiak Mit enggau Pengintu Pengelantang Pendiau Raban Bansa, Dato Sri Fatimah Abdullah madahka laban Sarawak iya nya negeri keterubah ke bisi bengunan disleksia ke diri empu sereta meri servis ngagai anak tauka nembiak ke bisi penanggul disleksia enggau program intervensi ungkup orang ke bisi penanggul enda nemu macha, nulis enggau ngira.
Lalu kena nyapai juluk ngembuan bengunan disleksia ke diri empu ti dipelaba beungkus RM4 juta, iya madahka, Gerempung Disleksia Sarawak udah ngatur mayuh bengkah aktiviti enggau program dikena ngiga belanja kena ngaga palan tu.
"Taja pia, ngiga belanja ke chukup besai kena ngaga perengka guna ke meri penguntung ngagai apai indai enggau anak ke bisi penanggul disleksia, begunaka ungkus belanja ti besai. Berindik ari nya, sida gerempung tu udah meri surat ngagai Premier Sarawak, minta bantu ngambika juluk deka bisi bengunan kediri awakka bisi alai ti lantang endur ngatur program intervensi ti ukai semina ungkup anak disleksia tang nyengkaum orang ke bisi penanggul belajar baka macha, nulis enggau ngira.
"Enti dipeda ari segi perengka guna ke disediaka tu (ba bengunan baru tu ila), aku ngasaika Sarawak iya nya sebuah ngeri keterubah bisi bengunan (Disleksia) ke diri sereta deka meri servis.
"Tu deka nyadi 'benchmark' ngagai gerempung disleksia bukai di serata Malaysia, tu ulih nyadi nyata laban kitai bisi NGO baka gerempung tu (Disleksia Sarawak) ti bebendar deka mantu anak tauka individu ke bisi penanggul disleksia," ku iya lebuh dikerandau raban pengarang berita ba opis iya di Ringkat 8, Begunan Baitul Makmur 2 ditu, kemari.
Dulu ari nya, nyerumba nerima penemuai basa Gerempung Disleksia Sarawak, Fatimah nyuaka geran RM3.95 juta ari perintah Sarawak ngagai Bendahari ti mega ketuai komiti projek bengunan baru Gerempung Disleksia Richard Sia sereta disempulang Mantan Presiden gerempung tu Dr Ong Puay Hoon enggau sida ke bukai.
"Perintah Sarawak meri geran tauka bantu sepenyampau RM3,954,500 (RM3.95 juta) dikena nambahka RM500,000 ke mujur digumpul Gerempung Disleksia nengah mayuh bengkah program enggau aktiviti, kena ngaga bengunan baru disleksia," ku Fatimah.
Nambah nya Fatimah ke nyadi penyanding penemu gerempung tu madahka, ba fasa ke-2 ila gerempung tu deka nyendiaka endur diau kena nangkup peminta guna nembiak ari luar Kuching.
Iya madahka Perintah Sarawak udah bekerejasama enggau Gerempung Disleksia Sarawak ngelatih pengajar ngena chara ti dikena gerempung tu kena napi penanggul anak tauka nembiak ke enda pandai macha, nulis enggau ngira, iya nya ngena chara fonetik.
Nitihku Ong, perintah negeri udah meri tanah ba Desa Wira di Batu Kawa kena Gerempung Disleksia Sarawak ngaga palan baru ti disikap tauka disediaka 10 buah bilik kelas, bilik pemansik, opis, bilik staf enggau balai mayuh guna.
Projek bengunan tu dipelaba ulih tembu dalam timpuh dua taun sereta diatu dalam renggat meresi taba projek.
Lalu ba bengunan baru tu mega ulih nerima urung 60 iku nembiak dalam siti timpuh, enti dibandiangka enggau diatu semina ulih nerima 10 iku nembiak dalam siti timpuh.
"Bengunan baru tu deka meri lebih penegap tauka pengering ngagai gerempung napi peminta guna ari bala anak tauka nembiak sereta ke besai tuai ke bisi penanggul disleksia enggau penanggul belajar (macha, nulis enggau ngira).
"Ba bengunan baru tu ila kami deka bisi mayuh kelas iya nya 10 iti sereta fasiliti ti manah agi dikena nembiak, dibandingka ba palan kami ke diatu semina bisi dua iti bilik kelas," ku Ong.