Anda di sini

KPWK, JPNS ngembuan batang tuju ti sama meri pemaik ngagai nembiak

Advertisement
Fatimah begambar bebala mayuh enggau raban JPNS ti diketuaika Azhar (dudk, dua kiba), ke bisi nemuai ngagai iya kemari.
Fatimah begambar bebala mayuh enggau raban JPNS ti diketuaika Azhar (dudk, dua kiba), ke bisi nemuai ngagai iya kemari.

KUCHING: Opis Menteri Pemansang Orang Indu, Nembiak Mit enggau Pengintu Pengelantang Pendiau Raban Bansa (KPWK) enggau Opis Pelajar Ngeri Sarawak (JPNS) sepenemu sereta bekerejasama kena nyapai objektif tauka batang tuju ti sama ti meri pemaik ngagai nembiak.

Menteri KPWK, Dato Sri Fatimah Abdullah madahka pekara nya udah dikerandau enggau Direktor Opis Pelajar Negeri Sarawak Datuk Dr Azhar Ahmad sereta tiga iku sapit direktor enggau dua iku pemesai ari Opis Menteri Pelajar Malaysia.

"Kami (opis menteri enggau JPNS) ngembuan penemu ke chukup manah, kerejasama ti manah, dua raban tu udah setuju iya nya kitai bisi batang tuju ti sama ke pemanah nembiak lebih agi dalam bidang pelajar.

"Agenda tauka pekara keterubah dikerandau tadi (kemari) bekaul enggau Sukan Olimpik Khas Negeri Ke-6 ti diatur di Sibu kena 1 ngagai 3 Julai 2022, ti deka dipenyadi YAB Premier Sarawak. Kitai (opis menteri) udah minta pemendar enggau peluang ari direktor opis pelajar ngambika ulih ngemendarka pengajar lebih agi pengajar pelajar khas begulai enggau nembiak ba Sekula Khas enggau Kelas Integrasi ba sekula, awakka sida ulih nyempulang nembiak khas ari PDK enggau ngambi bagi ba lumba tu ila.

"Direktor udah ngemendarka sereta nyamin ngagai komiti olimpik khas iya nya kerejasama deka diberi ari segi penyerata nembiak ba sekula enggau kelas khas, tang pemadu beguna aspek pengelikun mesti dikemeratka," ku iya bekunsi pekara ti dikaum enggau JPNS.

Dulu ari nya Fatimah nerima penemuai basa ari JPNS ti diketuaika Azhar, ba opis iya di Ringkat 8, Begunan Baitul Makmur 2 ditu kemari.

Nambah nya iya madahka, pekara kedua dikerandau bekaul enggau pelajar nembiak mit ke apin ditetapka nyadi peranak menua.

"Kami udah berandau sereta udah dipadahka,  bisi pekara dikemeratka iya nya enti apai indai ulih meri dokumen ke dipinta sereta nitihka syarat ke udah ditetapka, tu nadai penanggul.

"Sida (JPNS) bisi ngayanka bukti nembiak ke nadai peranak menua dikemendarka besekula.

"Enti ari segi Akta Kanak-kanak enggau pekeliling ke udah dikeluarka, bisi dua pekara iya nya apai rayat menua tu enggau bisi kelai peminta nyadi peranak menua, enggau tu anak ulih masuk sekula," ku iya nyebut entara pekara ti udah dikerandau sereta diatur begulai enggauu JPNS.

Kelimpah ari nya mega pemendar ngagai pengari rayat ngulu tauka bejadi pengerami pelajar sekula, napi penanggul isu dadah enggau substance enggau pekara bukai bisi dikerandauka enggau JPNS.
 

  • oleh
  • Advertisement