Anda di sini

Ungkus pemansut ai deka dikurangka, ku Julaihi

Advertisement

KOTA SAMARAHAN: Ungkus pemansut ai Sarawak diatu tinggi sereta patut dikurangka dalam timpuh ke deka datai tu.

Menteri Utiliti enggau Telekomunikasyen Datuk Julaihi Narawi madahka, taja pia tarif ai ti baruh agi patut diberi ngagai penguna tauka rayat negeri tu.

Berindik ari pekara tu, Julaihi ngarapka nengah sempekat pemereti ati (MoU) ke disain opis menteri iya begulai enggau Universiti Malaysia Sarawak (UNIMAS) ulih bekerejasama berate sereta ngiga chara mutarka pekara nya.

"Kemari (ensanus) aku bisi nerima licha khas ari Lembaga Air Sibu, ungkus pemansut (ai) iya nya RM1.11 per cubic meter enggau tarif iya 61 sen. Reti nya ditu bisi elemen subsidi, ungkus pemansut tinggi tang tarif ke diberi ngagai penguna semina 61 sen.

"Tu penyampau ke diatu, nuan enda nemu jemah ila ungkus iya deka nambah laban bahan kimia mar, ungkus maintenance nambah, sereta mayuh pekara bukai ke patut diperati tauka dikira kitai.

"Nya alai aku ngarapka MoU tu mega meda bakani kitai ulih ngurangka ungkus pemansut ai dalam timpuh ke semak tu. Laban ungkus iya makin sehari makin betambah, tang kitai deka ke tarif ai tu murah ungkup rayat di serata Sarawak, tu ke pemadu beguna," ku iya.

Julaihi mansutka pekara tu dalam aum pengarang berita pengudah Pengawa Nyain MoU entara UNIMAS enggau Opis Menteri Utiliti enggau Telekomunikasyen Sarawak, ti diatur ba Arena Gemilang, DeTAR PUTRA, UNIMAS ditu, kemari.

Sama bisi datai ngulu pengawa tu kemari, Sapit Menteri Utiliti enggau Telekomunikasyen Datuk Dr Abdul Rahman Junaidi, Sapit Menteri Telekomunikasyen Datuk Liwan Lagang enggau sida ke bukai.

(Duduk, ari kiba) Alice, Julaihi, Mohamad Kadim enggau Siti Noor nyain dokumen MoU, kelai berengkah bekerejasama bejalaika aktiviti, pengawa pemansik enggau pemansang dalam program bekal ai di Sarawak, kemari. 
(Duduk, ari kiba) Alice, Julaihi, Mohamad Kadim enggau Siti Noor nyain dokumen MoU, kelai berengkah bekerejasama bejalaika aktiviti, pengawa pemansik enggau pemansang dalam program bekal ai di Sarawak, kemari. 

Sempekat nya disain Julaihi enggau Sekretari Mendam opis menteri Dato Ir. Alice Jawan ngarika Opis Menteri Utiliti enggau Telekomunikasyen sereta UNIMAS diarika Vice-Chancellor iya prof Datuk Dr Mohamad Kadim Suaidi enggau Dekan, Fakulti Kejuruteraan Prof. Ir. Dr. Siti Noor Linda Taib.

Bejaku baru, ku iya, ambika chunto Opis Bekal Ai Menua Pesisir (JBALB) meli ai ungkus pemansut iya tinggi tang tarif ke diberi ngagai rayat murah, reti sida (JBALB) meri subsidi ngagai penguna sepenyampau RM150 juta setaun.

"Kelimpah ari di Bintulu kitai tauka Lembaga Air bisi pengarap bulih untung laban ti mayuh tauka bisi industry. Tang ngagai penguna biasa tarif ai jauh baruh dibandingka enggau ungkus pemansut," ku iya.

Dulu ari nya, lebuh bejaku ba pengawa nyain MoU, Julaihi madahka sempekat pemereti ati nya chukup beguna kena ngemansanga tauka ngemajuka industri bekal ai di Sarawak.

Nengah sukung ke diberi UNIMAS baka nyendiaka latih, enggau ngatur program kompetensi, kus pandak, seminar aum besai, bengkel enggau symposium, ku iya, kitai arap bendar ulih nempa pengereja pengawa ti bekualiti enggau cekap/sikar(competent) dalam industri bekal ai di Sarawak.

Nitihku iya, kelimpah ari kus enggau seminar, opis menteri enggau UNIMAS deka bekerejasama ba pengawa pemansik, study and consultancy bekaul pemansang bekal ai di negeri tu.

Setipak enggau juluk opis menteri deka nyendiaka pengereja pengawa bepengelandik, Julaihi madahka, opis menteri iya mega udah nyain MoU enggau Sarawak Skills sereta Akademi Binaan Malaysia Sarawak kena 8 Disember 2020, ti bekerejasama nyendiaka kus latih sereta alai sida nyadi palan penilaian ungkup orang ke deka nyadi ëLicensed Pipe Fittersí enggau ëMains Layersí.

Iya madahka nya amat beguna laban opis menteri deka ke mayuh agi ëpipe fittersí enggau ëmains layersí belisin enggau bepengelandik, ti dikearapka ulih ngaga tauka bejalaika projek bekal ai dalam Langgur Pemansang Malaysia Lumpar Ke-12.

"Kitai begunaka mayuh agi ëpipe fittersí enggau ëmains layersí ti bisi kelayakan ngaga kereja ti bekaul tun gena chara professional enggau bisi etika, kualiti kereja ti manah kena ngenukuka servis ti dikenataika ulih ngemuaska enggau cekap(competent) sereta ngurangka non-revenue water (NRW). Tu mega setipak enggau Strategi Pemansang Pengudah COVID-19 2030.

"Ngarapka pengudah nyain MoU tu, deka bisi kerejasama ti aktif, bisi asil enggau meri penguntung ngagai opis menteri enggau UNIMAS, kena ngangkatka produktiviti, kecekapan enggau pengawa meri servis bekal ai kami," ku iya.

  • oleh
  • Advertisement