MIRI: Opis Kereja Raya (JKR) Bagi Menua Miri madahka ungkus ngaga baru titi baru ba Kampung Mutap di Bekenu nengah Program Transformasyen Menua Pesisir (RTP) besai laban ngena kayu kering bansa tebelian nyengkaum ngaga pelantar sementara kena ngaga titi nya.
JKR Miri madahka pekara nya negah penerang berita ti dikeluarka ditu en sana kena nimbal tanya netizen ti enda setuju enggau ungkus ngaga projek jeti titi ngena bajet RM50,000.
JKR Bagi Menua Miri ngemansutka penerang nya kena 6 April tu tadi ti madahka titi Kampung Mutap di Bekenu udah tembu digaga ke beungkus RM50,000 nengah Facebook Komunikasyen Korporat JKR Sarawak.
Taja pia, penerang dalam Facebook nya dikerembaika ensana lebuh netizen madahka diri enda setuju sereta enda puas ati enggau ungkus projek nya.
"Anggar ungkus kaminitihka atur penyampau JKR Sarawak 2020 iya nya RM9,000 satu meter kubik ungkup kayu tebelian, lalu rega nya murah agi enti dibandingka engagu rega ke dijual ba pasar diatu," pia ku penerang nya seraya madahka SOR tau didownload ari website JKR Sarawak, enti deka nemu nya silik agi.
"Kami mega bisi berundingka gaya jalai alun iya nya jalai ladang ke Kampung Mutap, logistik enggau sukut pengelikun (laban menua nya mayuh baya).
"Dalam bajet RM50,000 ti diungkupka, kami ngaga langkar titi pemanjai 15 meter enggau dua iti tangga,” pia ku JKR Miri manah nengah penerang nya.
Bekaul enggau kronologi ngaga projek, opis nya madahka bisi ngabas palan projek di kampung nya kena 21 September taun siti nyin tadi.
Maya nya, JKR bisi meri langgur penemu deka ngaga titi besi laban nya teguh amat tang pengelemi iya, titi besi jauh lebih mar lalu pemesai buka titi digaga nya deka digaga mit agi enti dibanding enggau ke digaga ngena kayu tebelian.
Pengudah mendiangka penerang nya, Ketuai Kampung Mutap, Sediah Abdullah enda nerima langgur penemu ngaga titi besi tang milih ngaga titi nya ngena kayu tebelian.
Ketuai kampung nya mega meri langgur penemu lalu minta langkar titi pemanjai 30 meter nya disikap ngena langkau kayu.
"Taja pia, pemesai kami madah ngagai ketuai kampung nya, peminta iya udah ulih ditangkup laban bajet ti diungkup nya enda mayuh.
"Iya (KK Sediah) setuju ambika kami (JKR Miri) ngaga langkar titi nya nitihka bajet ti diungkupka," pia ku penerang nya.
Kelimpah ari nya, Ketua kampung nya mega bisi minta siti agi agih belanja ari Sapit Menteri Pemansang Orang Indu,Ruang Bilik enggau Anak Mit, Datuk Rosey Yunus ke mega ADUN Bekenu kena ngaga fasa kedua projek iti nya.
Projek titi nya tembu digaga 6 April tu tadi.
Pemesai JKR Miri enggau Ketua Kampung Sediah mega bisi meresa kereja ngaga projek nya lalu puas ati enggau kereja ke digaga kunteriktor.
Berebak enggau nya, Rosey lebuh ke dirandau Utusan Borneo malam kensana ngarapka penerang ari JKR Miri nya ulih nerangka reti semua penyerekang penemu bekaul projek nya ngagai penguna media sosial.
"Mensia mayuh patut minta penerang ari ejensi ke ngaga projek nya dulu sebedau kelalu jampat mansutka penemu tauka enda nemu utai ulu ili," ku iya.