KOTA SAMARAHAN:Isu ngenanka pemansang di negeri tu patut amat diputarka kena nyapai juluk ati perintah deka ngenanka rampa menua nengah juluk ngenanka pemansang pasar ti manah, di negeri tu.
Sapit Premier Sarawak, Dato Sri Dr Sim Kui Hian madah, sukut ke beguna amat iya nya semua mensia mayuh patut bejalaika pengawa nyaga rampa menua enda ngira bansa enggau jalai pengarap, di mengeri tauka di menua pesisir.
"Pemansang ti manah siti pekara ke beguna amat lalu mensia mayuh mesti semampai bisi tanggungpengawa nyaga pemeresi rampa menua.
"Anang sepeneka ati muai uras ba sebarang endur, buai ba endur ti udah disediaka lalu kitai mesti nentuka kandang endur ngelingi kitai beresi," ku iya lebuh ke dirandau media pengudah pengerami Ngelanchar 'Matlamat Pembangunan Mampan, Bandar Sihat' ti diatur Opis Kaunsil Kota Samarahan (MPKS), di Dewan Suarah ditu, kemari.
Sama bisi datai maya nya, Sapit Menteri Pengerai Mensia Mayuh, Pengawa Berumah enggau Kansil Kandang Menua, Datu Dr Penguang Manggil, Chairman MPKS, Dato Peter Minos enggau bala ti dikangauka datai ke bukai.
Sim ke mega Menteri Pengerai Mensia Mayuh, Pengawa Berumah enggau Kaunsil Kandang Menua madah, Pengawa tu (nyaga pemersi) ukai ketegal budaya tauka pengawa neritka adat, tang kitai empu dekaka endur diau ti seruran beresi sereta selamat.
"Di menua tasik sida ukai semina ngena baru utai ke dibuai baka uras enggau ke bukai, tang sida ngaga nya nyadi utai organik kena ngenanka rampa menua sida," ku I seraya madahka nya begunaka pemandai lalu pengawa ngulihka pemandai muntang agi enti bisi rampa ke beresi sereta likun.
Kelimpah ari nya kandang ngelingi, Sim madahka pengerai diri mega mesti dijaga enggau manah pengudah nyingkang ngaga endemik berengkah ari1 April tu tadi.
Ku iya, sikap mih kitai empu enggau bala anak ngena vaksin kena nyaga diri ari balat dirampit penyakit nya.
"Taja pia, naka ke diatu semina 78 peratus bala nembiak mit ti mar nerima vaksin laban sida mesti disempulang bala sida sebilik.
"Dalam konteks tu bala apai indai udah berngkah gawa sereta mer deka nyempulang anak sida betuchuk vaksin, taja pia apai indai ti enda sempat ke klinik pengerai, bisi palan vaksinasyen ungkup nembiak mit ke agi dibuka sereta enda bebayar," ku iya.
Berebak enggau nya, iya madah ,ayuh orang agi saru madahka kelai rampit COVID-19 tu enda dipeda ba hari keterubah enggau kedua.
"Nya semina deka diasaika ba hari ketiga enggau keempat ke alai sida deka berasai pedis, batuk, idung berai, pedis semua tubuh enggau ke bukai.
Nya alai, semua orang patut amat betucuk 'dos booster' lalu bala anak sida betuchuk vaksin kena nyeliahka ari balat sakit," ku iya.
Ku iya baru, bala nembiak mit ti bedau betuchuk vaksin, mesti deka bejejaga lalu selamat agi enti enda mai sida ngagai endur ke dedat.