TATAU: Bisi tujuh projek ari baruh Program Transformasyen Menua Pesisir (RTP) ungkup sitak Kunsil Nengeri (DUN) Kakus dalam taun 2021 udah tembu dipejalaika lalu tu udah nyendiaka perengkaguna ungkup peranak di kandang menua nya, ku Menteri ba Opis Premier Sarawak Datuk John Sikie Tayai.
Tujuh projek tu iya nya projek ngangkatmanah Jalai Rumah Japing di Nanga Dan, ngangkatmanah Jalai Rumah Jelia Sungai Gemuan, pengawa ngaga baru Jalai Rumah Berain Sungai Sangan enggau pengawa nyungkur taba rumah panjai di Rumah Kelambu enggau Rumah Jelian di Muput, Rumah Lemu Sungai Sebuluh enggau Rumah Indaituai ti mega di sitak ti sama.
“Unhkup langkar bejalaika projek RTP di sitak DUN Kakuddalam taun tu, perintah deka bejalaika projek ngangkatmanah Simpang Jalai rumah Atan Anggok enggau Rumah Charlie Anggok di sitak Ulu Nunok,” ku iya lebuh ti ngabas ke kandang endur bejalaika projek kena Hari Empat enggau Hari Lima nyin tadi.
Sama bisi dalam langkar tu ku iya, perambu nyungkur taba Rumah Roseline di Sungai Arip, Jalai Rumah Jali di bukit Dinding Mukah enggau Jalai Rumah Chuat Jimi di Sungai Arip, Selangau.
Enggau penembu projek RTP tu, ku iya, deka nyendiaka pemaik perengkaguna ungkup peranak kelebih agi di kandang menua pesisir ngambika ulih ngasaika pemisi prasarana sereta infrastruktur ke manah enggau lantang setipak enggau kandang mengeri.
“Tu mih kitai perintah Gabungan Parti Sarawak (GPS) ti seruran komited dalam bejalaika projek pemansang ungkup pengelantang pengidup rayat ke alai deka dipejalaika ninting maya nitihka guna sereta peminta rayat,” ku iya nambah.
Pengari Opis Kereja Raya Bagi Menua Bintulu Ngu Tie Hwa sama bisi dalam pengawa ngelawa nya.