SARATOK: Kaban Kunsil Nengeri (ADUN) Krian Friday Belik madahka semilan ketuai ruang bilik ti dituntung penusah angus rumah panjai ari Rumah Joshua Sulau, Tanjung Tapang, Mitas Simpang Awik, deka nerima bantu ngemanahka rumah sida.
Ku iya, agih belanja nya deka diberi nengah Opis Mutarka Penusah Ngenyit Nengeri Sarawak (JPBNS).
"Asil betemu enggau Chairman JPBNS Datuk Amar Douglas Uggah Embas, bedau lama ti udah, kitai udah berandauka pekara nya lalu... terima kasih nya udah dikemendar.
"Raban ari JPBNS udah besetuju deka meri bantu enggau agih belanja maksimum sepenyampau RM70,000, bepelasarka tikas tauka pelaba pengerugi enggau pengerusak ke ditapi peranak rumah panjai nya.
"Kitai ngarap enggau bantu tu, nya ulih mantu peranak rumah panjai tu, ngaga baru rumah panjai sida," ku Friday.
Iya madah munyi nya lebuh ti ditemu pengarang berita pengudah tembu ngatur program ngabas baru ke palan penusah nyadi di Rumah Joshua Tanjung tapang Mitas Simpang Awik, kilah ensanus.
Sama bisi dalam program tu iya nya pengari ari Opis Pelilih Menua Saratok.
Nitih ku Friday, penyampau bantu ngemanah ti deka diterima tetiap semilan pintu bilik tu ila iya nya bepanggai ngagai pengawa mansik tikas pengerusak ti deka diatur raban nya ila.
"Maksimum penyampau bantu ti deka diberi iya nya RM70,000 ungkup sepintu bilik.
"Kitai ngarap ngambika semua proses tu ulih dipejalaika enggau manah lalu tikas bantu nya ulih diberi ngagai peranak enggau lengkas," ku Friday madah.
Beserimbai enggau tu, Tuai Rumah (TR) Joshua Sulau mega ngenataika tabi basa enggau beterima kasih ngagai perintah Gabungan Parti Sarawak (GPS) ti udah meri enggau nyendiaka bantu ungkup bala peranak di rumah panjai iya ti tekeruga ketegal penusah ngenyit nya.
"Enggau awak tu mega, kitai deka meri besai terima kasih sereta tabi basa ngagai semua ti bekaul sekalika terus tauka enda dalam meri bantu ngagai peranak tu," ku Joshua nambah.
Dalam pengerami ti sama, Friday mega udah nyuaka Chek Geran Projek Mit Menua Pesisir (MRP) ngagai Komiti Pengelikun enggau Pengelantang Genturung Pendiau (JKKK) Rumah Joshua sepenyampau RM4,000 kelimpah pemeri ari iya empu sepenyampau RM11,000.