KUCHING: Opis Premier Sarawak deka ngemansutka dokumen sementara ngagai sida ti beumur 21 taun ke baruh ti nadai ngembuan status peranak menua.
Menteri Pemansang Orang Indu, Nembiak Mit enggau Pengelantang Komuniti Dato Sri Fatimah Abdullah madah, nya nyadika sukung dikena nentuka sida tau, bisi akses ngagai perengkaguna pelajar sereta pengerai.
Peminta ngulihka dokumen sementara tu, ku iya, ulih digaga nengah Komiti Khas Status Peranak Menua ari baruh Pekara 15A Konstitusyen Perintah Besai.
"Taja pia, pengawa ngemansutka dokumen sementara tu semina ungkup tuju dikena ngemuntang enggau mantu individu nya dalam minta akses senentang perengkaguna pelajar enggau pengerai di nengeri tu.
"Tu ukai nya jamin tauka semaya iya nya sida deka bulih status peranak Malaysia sebaka mega bakani perintah nengeri bebasaka kuasa enggau hak perintah besai," ku iya.
Iya madah munyi nya ba aum media bekaul isu peranak menua ari baruh Pekara 15A Konstitusyen Perintah Besai ba Bilik Seminar Pustaka Negeri ditu, kemari.
Ku Fatimah madah, pemendar deka ngaga peminta status peranak menua Malaysia iya nya endang kuasa penuh perintah besai nengah Opis Menteri Dalam Menua (KDN).
Nitih ku iya, perintah Sarawak ngena chara tu laban ti sedarka isu individu ti bedau temu status peranak menua ke betapi enggau penanggul deka bulih akses ngagai perengkaguna pelajar sereta pengerai kelebih agi ungkup nembiak mit.
Nya alai, ku iya, kabinet nengeri udah mutuska deka meri nama pan gaya bantu ari dalam kuasa iya ungkup raban nya.
"Ngembuan akses ngagai perengkaguna sereta pelajar pemun iya nya hak asal mensia lalu nadai sapa pan ulih ngerampas hak tu," ku iya nyemetak.
Lebuh ti ditanya bekaul penyampau peminta status peranak menua ti bedau diputarka, ku iya, raban sida nadai ngembuan data penuh bekaul pekara nya.
Ku iya, sebedau Komiti Khas Status Peranak Menua ari baruh Pekara 15A Konstitusyen Perintah Besai ditumbuhka dalam taun 2016, peminta ungkup tuju nya udah dianjung terus ngagai Opis Menteri Dalam Menua.
"Pengudah komiti tu ditumbuhka, tetiap peminta ti digaga nengah Opis Pengerejista Bansa (JPN) Sarawak enggau ti nangkanka nya dianjung ngagai komiti tu ngambika ulih dirikod.
"Taja pia Komiti Khas Status Peranak Menua ari baruh Pekara 15A Konstitusyen Perintah Besai kala 'diketuka enda lama' maya perintah besai ari baruh pegai Pakatan Harapan sebedau berengkah diaktifka baru ba taun 2021 nyentukka diatu," ku iya nerang.
Sama bisi datai Sapit Menteri Pengelantang Komuniti Mohd Razi Sitam enggai Direktor Opis Pengintu Pengelantang Pendiau Komuniti (JKM) Sarawak Noriah Ahmad.