MIRI: Pengawa ngatur Gawai Bazaar dipeda ukai semina nyadika pelasar dikena ngelakuka pemakai asal tang mega nyadika jalai dalam mantaika adat enggau main asal komuniti Dayak di nengeri tu ngagai bala temuai ari menua tu tauka ari menua luar, ku Sapit Menteri Infrastruktur enggau Pemansang Palan Penyangkai Kapal Dato Majang Renggi.
Pia mega, iya pechaya dalam timpuh panjai, empas pengawa ngatur bazaar tu ulih mega nerenakka runding nyadi orang dagang dalam komuniti Dayal kelebih agi raban nembiak.
“Kelimpah ari nya mega, enggau ngatur pengawa tu ti komprehensif agi, aku pechaya pengawa ngatur Gawai Bazaar jemah ila ulih nyadi produk dagang temuai sereta meri pemaik lalu nyukung pemansang ditu,” ku iya.
Majang ti ngarika Sapit Premier Sarawak Datuk Amar Douglas Uggah Embas madah munyi nya ba Pengerami Pra Ngemunka Gawai Dayak Bazaar 2022 ti diatur Gerempung Gagasan Anak Dayak Sarawak (GADS) ti bepalan di Hotel Meritz, kena malam Hari Empat nyin tadi.
Sama bisi datai iya nya Kaban Kunsil Nengeri (ADUN) Pujut ti mega Datuk Bandar Miri Adam Yii, Penyanding Penemu Undang-undang GADS Jonathan Bedindang, Chairman GADS ti mega Chairman Gawai Dayak Bazaar 2022 David Upe enggau temuai dipebasa ke bukai.
Nitih ku Majang, iya muji pengawa sereta inisiatif ti diambi GADS ti meri konsep baru nengah ngatur Gawai Bazaar nya ti endang dianti datai baru pengudah dua taun betangguh ketegal pandemik COVID-19.
“Seriris enggau pemansang sereta ubah jeman, konsep sereta ngintu Gawai Dayak mega sama kena empas ubah nya.
“Taja pia, aku endang nerima manah enggau nerenakka elemen sereta pengawa ekonomi nengah pengawa numbuhka Gawai Bazaar bansa tu.
“Tu ukai semina nyadika pelasar penyatup pupu raban bansa, tang mega nyadi medium ngambika terus ngenegapka penyerakup entara raban bansa,” ku iya nerang.
Nya alai, iya dekaka sida ti bekaul enggau Gawai Bazaar tu ila nyadika nya peluang dikena sama betukar penemu enggau buah runding ti nguing ngagai batang tuju sereta selubang sepenemu dalam nentuka pengawa ngatur Gawai Bazaar nya ulih nempa sejarah kediri.
Beserimbai enggau tu, Majang sama ngelelau ngambika seruran ngasika jaku tangkan ti udah ditetapka taja udah ba fasa endemik, Prosedur Operasyen Standard (SOP) agi dikemeratka berindik ari menua mengkang betapi enggau pengelekai igi penyakit COVID-19.
Ba pengerami nya mega, Majang udah madahka agih belanja sepenyampau RM35,000 ari Uggah ungkup GADS dalam nentuka pengawa ngatur bazaar tu dipejalaika enggau manah.
Dulu ari nya, dalam jaku pengelalu David, iya madahka Gawai Bazaar nya deka diatur berengkah 1 nyentuk 22 Mei 2022.
Beserimbai enggau tu, iya ngarapka sukung semua raban kelebih agi kaban GADS dalam mantu ngemujurka pengawa ngatur tu ila.