SARATOK: Dua projek ngangkatmanah jalai ke beungkus RM250,000 udah mujur diserahka Opis Kereja Raya (JKR) Saratok ngagai kunteriktor ke patut ngaga nya, kena Hari Tiga tu tadi.
Pengawa nyerahka projek tu dikemataka Kaban Kunsil Negeri Krian, Friday Belik.
Ku Friday, dua projek tu deka digaga ari baruh program Transformasyen Menua Pesisir (RTP) dalam timpuh ke semak tu.
"Dua projek nya, ngangkatmanah jalai Sekula Primari (SK) Ulu Sebetan nyadi jalai semin pemanjai urung 91 meter ke beungkus RM50,000.00 .
"Projek kedua iya nya ngangkatmanah jalai Rumah Unong, Tinting Berang, Batu Anam Sebetan nyadi jalai belakin ke beungkus RM200,000," ku Friday.
Kunteriktor ti ngaga projek tu udah dipilih nengah proses chabut undi ti dipejalaika ba Opis Residen Bagi Menua Betong, bedau lama udah.
Ku Friday,ungkup projek ngangkatmanah Jalai SK Ulu Sebetan, timpuh nembuka pengawa ngaga jalai nya pengelama tiga bulan.
"Enti projek tu tembu digaga ila, nya deka meri jalai ke manah sereta selamat agi ngagai raban sekula nya.
"Ungkup projek kedua, iya nya ngangkatmanah Jalai Rumah Unong, Tinting Berang di Batu Anam, Sebetan nyadi jalai belakin ke pemanjai urung 200 meter, nya patut digaga tembu dalam timpuh empat bulan ari hari bulan setuju nerima projek.
"Jalani tu ila deka meri pemaik ngagai beberapa buah rumah panjai bukai ba kandang menua nya" ku Friday.
Berebak enggau nya, Friday ngarapka kunteriktor ke udah dipilih ngaga projek nya ila, nembuka kereja sida enggau manah sereta nitihk standard kereja ti udah ditetapka ejensi ke ngaga nya.
Ku iya, kunteriktor ti dipilih ungkup kedua-dua projek tu ila mesti bejalaika tanggungpengawa sida enggau manah sereta nentuka
projek bya ditembu nitihka pematu ti ditetapka dalam surat setuju nerima projek.
Kedua-dua projek tu sebagi ari 18 bengkah projek ti deka digaga ar baruh ungkup belanja Tranformasyen (RTP) taun 2021 DUN Krian ke beungkus RM 2.5 juta.