KUCHING: Orang betanam betanam lebih agi raban biak rebak baru ke deka ngereja pengawa dagang betanam betupi enggau ladang diperansang minta geran enggau duit jali ke bisi disediaka perintah, kena ngepun enggau ngemesaika dagang,
Sapit Menteri Betanam Betupi Moden enggau Pemansang Kandang Menua Martin Ben madahka, geran enggau duit injau ke disediaka perintah nya dikena nyukung enggau mantu orang ke udah lama enggau baru ba pengawa betanam betupi tauka ladang menua tu awakka ulih nyungkakka penatai pemisi enggau ikas pengidup.
Iya madahka kelimpah ari nambahka penatai pemisi pengawa dagang enggau orang ke gawa, tu mega deka meri pangka manah ngagai ekonomi menua tu.
"Kelimpah ari nya perintah negeri bisi nyediaka Sarawak Agro Fund (SAF) sebengkah program ti meri geran enggau duit injau ngagai orang betanam betupi baru kena ngepunka dagang enggau lebih agi ngagai sida ke udah lama kena ngemesaika dagang sida.
"Kebendar Premier Datuk Patinggi Tan Sri Abang Johari Tun Openg apin lama udah nambahka RM100 juta ngagai wang turu tu kena ngemaju enggau modenka agi sektor betanam betupi negeri.
"Nya alai aku meransang sida ke bebendar tauka serius beranakka puku dalam pengawa dagang betanam betupi berunding minta geran tauka duit injau kena ngangkatka agi dagang sida," ku iya.
Martin mansutka pekara tu nyerumba iya bejaku lalu bejadi 'Gardenscapes Sarawak 2022: A Gardening & Farming Expo' ti diatur Place Borneo Sdn Bhd ba sebengkah palan bebeli barang ditu, kemari.
"Kami (perintah) bebendar meransang raban biak rebak baru ngemeranka pengawa dagang betanam betupi ngena teknologi moden enggau 'precision farming', enggau SAF tu ke udah tentu ulih mantu dlam bidang tu," ku iya.
Bejaku baru iya madah, siti agi kebuah negeri meransang lebih mayuh pengawa dagang betanam betupi enggau ladang iya nya awakka negeri ulih nyadi negeri ngeluarka pemakai bisi kuantiti enggau kualiti sereta ukai bepanggai ngagai pemakai enggau asil import.
Ku iya, tu setipak enggau juluk perintah deka nyadi negeri pengeksport beresi pemakai enggau produk pemakai lebuh manggai taun 2030.
Kelimpah ari nya iya madahka pengawa betanam mengeri ti nyadi pekara dikerindu enggau nambahka penatai pemisi udah majak nambah tauka mayuh dikereja kenyau beberapa taun ke udah lebih agi maya ti enda dikemendarka mindah ketegal pandemik ke nyadi.
Laban ku iya pengawa betanam mengeri tu ulih dikereja ngena chara kebun tauka ladang mit sekalika di rumah diri empu ke ulih dipejalaika ngena chara hidroponik.
Iya meri puji ngagai Gardenscapes laban ti nempa kerejasama enggau mayuh badan amal nyengkaum sida Kuching Autistic Association (KAA) enggau SSPCA.
"Aku meri puji ngagai Gardenscapes Expo keterubah ti diatur Place Borneo, aku ngarapka tu deka nyadi ekspo tiap taun ti meri penguntung ngagai orang bekebun enggau ladang ti ukai semina di Kuching, tang selampur Sarawak," ku iya.
Nyerumba pengerami tu Martin madah diri ngungkupka belanja ngagai RM5,000 ngagai KAA enggau SSPCA (RM5,000).
Bisi ba program tu kemari Chief Executive Officer (CEO) Place Borneo Sdn Bhd Mona Abdul Manap sereta digulu CEO Business Events Sarawak Amelia Roziman enggau sida ke bukai.