Anda di sini

Perintah komited nentuka SDGp diaku nyadi Geopark Menua

Advertisement
Tanjung Rhu
MANAH DIPEDA: Tanjung Rhu

KUCHING: Perintah Sarawak amat komited deka nentuka Sarawak Delta Geopark (SDGp) diaku nyadi Geopark Menua taun tu, pia ku Menteri Muda Pengeraja Adsal enggau  Pemansang Mengeri, Datu Len Talif Salleh kemari.

Nya alai ku iya, siti sesi beratika SDGp deka dipejalaika Panel Pemerati berengkah ari 19 nyentuk 21 Januari 2022 enggau pengemata ari Komiti Beratika Geopark Menua.  

"Kebuah pia, geopark mega sebengkah kandang endur ti bisi palan pesaka geologi ti tau dikena semua ke tuju pengawa ngintu,pelajar enggau pemansang ke manah," ku iya.

Ku iya baru, sesebuah geopark mesti bisi ekologi, arkeologi, sejarah enggau budaya.

Nya alai, pengawa milih Sarawak Delta nyadi geopark endang patut amat laban setipak enggau pemisi ti dikembuan sebuah geopark, laban kan dang endur nya ngembuan pesaka geologi enggau geobudaya.

Kandang Sarawak Delta kebendar iya ngembuan geologi enggau geomorfologi ke nyelai sereta bisi rega geobudaya ke tinggi,ku iya.

Langgur penemu ambika Sarawak Delta Geopark diaku nyadi Geopark Menua, UNESCO Global Geopark udah dikemendarka perintah negeri dlam bulana November 2019 sereta dilancharka Kepala Menteri kena 9 April 2021, ba Kampung Budaya Sarawak ditu.

"SDGp ngembuan pemesai 311,246 hektar ti mungkur kandang ai enggau darat ngarika federasyen pesaka geologi, biologi enggau budaya ke bisi ba pelilih menua Kuching, pelilih menua Bau, pelilih mit Padawan enggau pelilih mit Siburan.

"Sesi beratika nya beguna amat ngagai perintah negeri ambika SDGp diaku nyadi Geopark Menua lalu nangkanka nya ba renggat antarabansa ungkup  pengawa nyaga enggau ngintu pesaka geologi, biodiversiti, sejarah enggau budaya nengah konsep pemang ti manah," ku iya madah nyemetak. 

Lebuh ngemansangka kandang Sarawak Delta Geopark, Kerajaan Sarawak deka ngemeratka tiga batang pekara iya nya nyaga enggau ngintu pesaka, pemansang ekonomi enggau pemansang komuniti.

Sarawak Delta Geopark deka nyadi platform kena  ngempung rampa menua enggau pengawa ngintu pesaka budaya nyadi siti entiti ke sebela.

Pengawa tu deka beratka semua orang ke bekaul baka opis bekuasa kandang menua,mensia mayuh, pengemeran industri pelancongan enggau mensia mayuh ke diau ba kandang menua nya.

Tja pia ku iya, pengawa ngaku nyadi geopark tu enda ngubah polisi pemansang ke diatu.  

"Nya mesti setipak enggau guna tanah ke diatu enggau ke udah diperambu perintah negeri. Nengah inisiatif pemansang 'geotapak', nya deka ngemansangka sosioekonomi peranak menua dia nengah geodagang temuai ba endur nya. 

"Geodagang temuai nya produk baru ti mantaika landskap geologi ngagai mensia mayuh bepelasarka dagang temuai penemu enggau rekreasyen," ku iya.

Tu tau nyendiaka pakej dagang temuai ke manah agi dikelakuka ngagai temuai menua tu enggau ari menua tasik. 

Panel berati enggau pemerati ari Komiti Beratika Geopark Menua nya diarika Chairman Komiti Ngatur Geopark Menua, Profesor Dato Dr Mokhtar Saidin ti deka ngepunka sesi berati ke deka meri  penerang ngagai Sekretari Mendam Opis Menteri Pemansang Mengeri enggau Pengeraja Asal Sarawak selaku ke mega chairman Komiti Teknikal SDGp, Datu Zaidi Mahdi, bekaul enggau Sarawak Delta geopark.

Nya ditangkanka enggau Direktor Opis Kampung Sarawak ke mega Chairman Raban Kereja Pesaka enggau Ngintu Saintifik Datu Hamden Mohammad, Direktor Unit Perambu Negeri ke naydi Chairman Raban Kereja Pemansang Datu Dr Muhammad Abdullah Zaidel, Sekretari Mendam Opis Menteri Dagang Temuai, Industri Kreatif enggau Mantaika Seni ke mega chairman Raban Kereja Pemansang Produk Dagang Temuai enggau Promosyen, Hii Chang Kee sereta Residen Bagi Menua Kuching ke mega Chairman Raban Kereja Pelajar Perintah enggau Penyereta Komuniti Datu Sherinna Hussaini.

Sesi beratika nya deka diatur pengelama selama tiga hari ti mungkur dua panel beratika nya, iya nya Profesor Dr Felix Tongkul ari Universiti Malaysia Sabah (UMS) ke mega tebangkar geologi enggau tebangkar biologi Universiti Malaysia Terengganu (UMT) Profesor Dato Dr Mohammad Tajuddin Abdullah.

Bisi siku agi pemerati enggau maya sesi tu, iya nya Suslyna Abdul Latib ari PlanMalaysia ke mega pengari ari Opis  Menteri Kuasa enggau Pengeraja Asal Malaysia.  

Kelimpah ari sesi meri penerang, bala panel mega deka ngabas palan geotapak, biotapak pesaka asal di Kampung Budaya Sarawak enggau Tg Tgok Santubong, Taman Negara Kuching Wetland, Taman Negara Bako sereta ke Tasik Biru enggau palan pesaka asal Bung Jagoi di Bau.  

Sebedau nya, raban panel berati enggau pemerati deka dirami ba sebengkah pengerami makai lemai, ke alai sida deka diperindang ngena main asal ari mayuh bengkah raban etnik Sarawak enggau pemakai menua tu ke nyelai (geofood). 

Advertisement