KUCHING: Sarawak ti udah nginsit ngagai Fasa 4 Pelin Mulaika Pemanah Menua (PPN) kenyau ari 3 Januari tu tadi, diaku meri empas positif ngagai orang ti ngemeranka premis nyengkaum orang dagang mit enggau ke bedaja dalam sektor pemakai.
Tinjau Utusan Borneo dalam kandang mengeri besai Kuching kemari beratika, tebal agi sida nya udah nyintak seput lantang laban udah kelalu lama napi pemar ketegal pandemik COVID-19.
Ungkup pengempu kedai Thousand Miles Casserole Morna Chin, pengudah nginsit ngagai PPN fasa empat, dagang nyual pemakai iya ti bekonsepka‘claypot’ diatu majak pulai manah baru.
“Enti sebedau tu, deka nyual 10 claypot pan pedia amat, tang pengudah ke nginsit ngagai PPN fasa empat, asil ke ulih bejual nya majak manah nyentuk ke ulih nyual 50 claypot sehari.
“Engka ketegal kes ninting hari COVID-19 amajk kurang, tambahmega mensia mayuh dah tembu betuchuk dos vaksin ngujungka sida enda nangi agi makai ba premis nyual pemakai,” ku iya.
Morna ti dah setaun bejual ba Heng Ki Kopitiam, Galacity ditu, ngarapka gaya pandemik tu majak belinsur manah awakka majak ulih bedagang.
“Aku enda b ejual, mar aku deka mayar baka suwa kedai, bil utiliti enggau ke bukai nyentuk ke ngena duit galau.
“Pekereja mega enggai enda pan diketuka gawa laban aku enda tebayarka gaji sida.Nya alai aku ngarapka pengudah ke nginsit ngagai Fasa 4 Pelin Mulaika Pemanah Menua (PPN) tu, ulih muka pengawa puang ngagai orang kelimpah bulih penatai pemisi,” ku iya.
Pengempu Putrilysious Kitchen ba Waterfront Kuching, Dilaila Nur Affiza Ismail berasai gaga ati laban asil ke ulih iya bejualnambah lebih 100 peratus, jauh amat bida enti dibandingka enggau maya Atur Nagang Pemindah (PKP).
“Sebedau Fasa 4 PPN, dagang lubah. Bisi siti maya, aku enda tejualka utai tang nyadi orang dagang, enggai enda pan aku napi nya laban berundingka suwa endang tetap deka dibayar.
“Diatu pengudah ke nginsit ngagai Fasa 4 PPN, sambut ba kedai tu manah amat, ukai semina ba orang ditu aja tang bisi mega ke datai makai kitu ari negeri bukai,” ku iya.
Iya ti udah ngemeranka dagang nyual pemakai lebih ari 13 taun madah, jam maya bejual ba Fasa 4 PPN ti u dah dilanjarka ,ngujungka mensia mayuh tau datai makai kia.
“Diatu kami beroperasyen ari pukul 5.30 lemai nyentuk 12 tengah malam enti dibandingka enggau ke sebetu ti berengkah ari pukul 5.30 lemai nyentuk pukul 8 malam,” ku iya seraya ngagai PKPenda dipejalaika agi.
Pengempu Kedai Popia Basah Mengarey di Metrocity, Matang, Norhajar Jamayah Wahi madah, dagang iya diatu nadai mayuh bida enggau maya ba fasa tiga laban jam operasyen dagang iyasemina naka pukul 5 lemai tiap hari.
“Ba aku nginsit ngagai fasa 4 tu nadai mayuh bida lalu penyampau orang ti datai mega nadai mayuh berubah. Engka laban kedai aku enda nyendiaka alai makai ba premis, tambah mega jam operasyen semina naka lemai hari aja,” ku iya.
Taja pia, iya ngarap Fasa 4 PPN ulih nginsit ngagai fasa endemik ambika dagang ulih diteruska.
Siku orang dagang ABS Warisan Sejahtera ke nyual apam balik, Muhammad Azri Safar madah, iya beratika penendu ke diberi perintah dalam Fasa 4 PPN tau nyadi ke perangsang ke pemansang dagang ba bulan ti nangkanka nya.
“Ba aku, dagang aku nadai balat tekeruga laban bisi sukung ari kuasa media sosial kena ngelakuka produk enggau servis dagang aku. Enti deka nemu pasal penambah ba asil ke dijual agi kelalu tumu aku deka madahka nya laban Fasa 4 PPN baru berengkah tang kitai ngarapka dagang majak maju dudi ila,” ku iya ti udah tujuh taun bejual di Gita.
Iya ngarapka penen du ke baka tu dipajakka belama serata ngelalau bala semua ngasika SOP kena ngemunaska pengelekai COVID-19.