KOTA SAMARAHAN:Kaban Kunsil Nengeri (ADUN) Stakan Datuk Hamzah Brahim ngansak Opis Kereja Raya (JKR) ngambika bebendar dalam mutarka penanggul jalai sekut dikandang menua tu.
Iya madahka, nama pan chara sereta jaku ansak ti digaga naka ke diatu iya nya ungkup guna rayat kelebih agi di Kota Samarahan.
“Aku pechaya isu jalai sekut di kededua jalai ditu (Kota Samarahan) iya nya Jalai Datuk Muhammad Musa enggau Jalai Besai Kuching-Samarahan nyadi isu ti benung dikejaku diatu.
“Taja pia kitai udah berandau enggau ejensi ti bejalaika pengawa (JKR) nyengkaum Majlis Perbandaran Kota Samarahan (MPKS) kena mutarka penanggul nya.
“Asil nya, JKR nguji ngiga jalai lalu chara mutarka penanggul jalai sekut tu endang dikemeratka,” ku iya maya aum media pengudah Pengerami Nyuaka Kunchi Medan Selera MPKS ditu malam kilah ensanus.
Beserimbai enggau nya, Hamzah madah, pun penanggul jalai sekut tu nyadi iya nya ketegal pemansang ti nyadi ba sekeda kandang menua.
“Kitai taja pia enda ulih nyeliahka ari sukut aspek jalai ti sekut laban tu entara proses tiap kali bisi pemansang, tang kitai bebendar deka ngurangka penanggul nya,” ku iya.
Bekaul enggau timpuh jalai sekut ti ngeruga penguna jalai kelebih agi di Kota Samarahan, Hamzah madah nya ulih diputarka nyema projek pemansang tembu nitihka timpuh.
“Timpuh ti diberi tu aku enda besemaya kemaya nya ulih ditembuka. Ambika chunto pengawa ngaga 'roundabout' Jalai Besai Kuching-Samarahan iya nya projek sakit patut nya tembu kena Hari Lima nyin tadi.
“Tang sampai ke sehari tu bedau tembu lalu aku pechaya JKR bisi pelin lalu aku dipadahka JKR udah diberi jaku tangkan kepenudi bekaul pengawa ngaga jalai nya,” ku iya.
Beserimbai enggau nya, ungkup Jalai Datuk Muhammad Musa, iya madah jalai nya deka tembu kena taun ti deka datai nitihka timpuh bejalaika projek nya.
“Kena ngurangka penanggul jalai sekut ditu, aku mega dipadahka dua jalai iya nya siti jalai ari baruh Opis Menteri Kereja Raya (KKR) nyendiaka siti agi jalai (link) ti ngena nama Jalai Lapangan Terbang lalu diatu benung digaga.
“Pia mega siti agi jalai iya nya ari baruh pelin perintah nengeri di kandang menua Tambirat,” ku iya.
Iya mega madah, pengawa nembuka duajalai tu ila deka ngurangka isu penanggul jalai sekut di Kota Samarahan lalu nya nyadi pelin perintah diatu.