BAU: Daid Nigot,67 peranak Kampung Opar ti kena penasah Ribut Monsun Timur Laut ngarapka bantu lengkas ari perintah.
Daid ti bisi tujuh iku diri sebilik madahka, 95 peratus rumah iya rusak sereta diatu diau ngenduh ba rumah kebun.
"Pengerusak rumah ke ditapi aku ketegal ribut ti balat tu urung iya 95 peratus, dalam rumah endang balat jai (kelimpah ari atap rumah ti terebai).
"Pengerugi aku dalam RM50,000 ngagai RM80,000 bepelasarka nama ti diperambu JKR (Jabatan Kerja Raya).
"Taja pia kami sebilik semua selamat nadai bebadi, semina rumah ti balat rusak. Nya alai aku udah minta perintah ngambika meri bantu enggau lengkas," ku iya lebuh dikerandau raban pengarang berita kemari.
Dulu ari nya Daid nerima penemuai ari Kaban Kunsil Negeri (ADUN) Opar Billy Sujang ti ngabas proses nyeruri rumah seraya nyuaka bantu.
Daid siku ari 16 ruang bilik ti kena penasah nya lebuh ngingatka pekara nya nyadi, iya madah ribut balat nyadi urung pukul 620 lemai sereta dalam beberapa minit ngerusakka rumah.
"Maya ribut tu nyadi aku duduk ba ruai rumah aku, aku ninga munyi balat, baka bunyi bom.
"Aku pansut ke luar, aku meda baka remang ti betugung nurun sereta dalam enda lama aja aku meda atap rumah dapur enggau stor abis terebai sereta rusak.
"Dokumen beguna baka surat veteran, surat pala tanah enggau ke bukai ti disimpan dalam beg chelum digantung atas katil bilik tindok, enda nemu kini tunga terebai," ku iya.
Nitihku iya Opis Pelilih Menua Bau enggau Opis Pengintu Pengelantang Raban Bansa Bau minta sida pindah ngagai Palan Pengenduh Sementara (PPS) sereta ngenduh ba PPS dalam tiga tauka empat malam.
"Bisi sekeda orang nya diau ba rumah kaban belayan, baka aku empu, kami sebilik diau ba rumah kebun diatu, nya alai kami amat ngarapka pengawa nyeruri tauka bantu tu tu lih dipejalaika enggau lengkas," ku iya.
Kelimpah ari nya, Nojiw Ngenang, 63, lebuh dikerandau madah kenyau maya penusah tu nyadi kena 4 Januari 2022, proses nyeruri rumah dipejalaika tumu enggau jampat.
Iya ti gawa ba Salcra mega berasai lantang ati laban sida tiga diri sebilik nadai bebadi semina rumah ti balat rusak.
"Berasai gaga, proses nyeruri rumah tu enyau deka tembu. Taja gaya hari selalu ujan tang sida ke nyeruri rumah tetap ngereja pengawa sida.
"Meri puji ngagai YB ke udah meri pemeri enggau bantu, kena mantu kami ke kena penasah ngenyit tu.
"Puji Tuhan laban kami agi ditu, laban nadai bebadi nyawa," ku iya ti dulu ari nya nerima penemuai Billy ti seraya ngabas proses nyeruri enggau nyuaka bantu.