Anda di sini

Orang ti enda entap pendiau deka disediaka TTG

Advertisement
 

MIRI: Pengawa numbuhka Palan Transit Orang Ti Enda Entap Pendiau (TTG) di Miri deka dipejalaika pengudah aum ti silik diatur kena 19 Januari tu, ku Menteri Pemansang Orang Indu, Nembiak Mit enggau Pengelantang Komuniti Dato Sri Fatimah Abdullah.

Ku iya, opis menteri iya udah beratika palan ti engkeman ungkup tuju nya lalu aum ti silik deka diatur begulai enggau raban ti bekaul.

“Palan nya enda jauh ari pasar besai laban kitai dekaka nya nyadi palan transit ungkup sida ti nadai entap pendiau meresika diri, maka lemai enggau tinduk sebedau pansut baru hari siti bekereja tauka ngiga pengawa sereta ngatur pengawa bukai.

“Nya alai, aum ke silik agi deka diatur kena hari (19 Januari) nya ila,” ku iya nerang.

Iya madah munyi nya maya aum media pengudah datai ke Woksyop ' Penetapan Program dan Intervensi Sosial Tahun 2022' ti diatur Kaunsil Pemansang Rama (MPS) di Hotel Pullman Miri Waterfront, kemari.

Sama bisi datai iya nya Direktor Opis Pengintu Pengelantang Pendiau Komuniti (JKM) Sarawak Noriah Ahmad, Sekretari Eksekutif MPS Dr Zufar Yadi Brendan Abdullah sereta temuai dipebasa ke bukai.

Nitih ku Fatimah, raban sida pechaya ulih ngatur TTG nya berindik ari projek ti keterubah di Sibu udah bejalaika operasyen.

“Berindik ari nya, kitai mega dekaka sida (orang ti enda entap pendiau) sama nemu enggau konsep TTG tu. Tu iya nya sementara aja. Lebuh sida udah bisi pengawa sereta ulih ngidupka diri jemah, sida mesti ngiga palan kediri,” ku iya.

Fatimah mega nerangka, orang ti enda entap pendiau tu diberi timpuh pengelama tiga bulan di TTG lalu pengudah ari timpuh nya, sida deka dipansik baru sekalika deka diberi timpuh ti lebih tauka enda di TTG nya.

Tu ku iya kena nyeliahka sida ti enda entap pendiau tu beambi ulih ari perengkaguna nya lalu enda bebendar ngidupka diri.

“Batang tuju kitai iya nya deka mantu sida ulih ngidupka diri lalu nyeliahka sida ari tinduk di sebarang endur.

“Baka di Sibu, aku mega udah dipadahka bisi entara sida nya udah bulih kereja. Pia mega, kitai deka mantu sida ngiga pengawa ti engkeman enggau sida baka ba pak kupi ti nyangka deka ngambi sida bekereja,” ku iya.

Iya mega nambah, sebedau sida ti enda entap pendiau tu dikemendar tama ke TTG nya, sida deka diperesa sekalika bisi ngambi dadah tauka enda.

“Nyema sida bisi penyalah rama baka gian dadah tauka pengirup arak, deka bisi intervensyen ti patut.

“Kitai deka nganjung sida ngagai raban ti bekuasa sereta ejensi ti bekaul,” ku iya nerang seraya nambah TTG nya mega deka ngembuan bilik ungkup lelaki enggau orang indu, bilik berandau enggau kaunseling.

Entara pekara bukai dalam aum nya ila, ku iya, iya nya kena sama numbuhka Palan Sukung Rama Komuniti di Miri.

“Kitai udah bisi ti nyendiaka palan ungkup tuju nya. Nyema aum nya dipejalaika enggau lanchar, nya alai kededua nya (TTG enggau Palan Sukung Rama Komuniti) ulih dipejalaika dalam taun tu,” ku iya.

Iya madah, naka diatu bisi 158 iku orang ti enda entap pendiau udah ditemu sereta direjister di selampur Sarawak.

“Kelimpah ari Miri enggau Sibu, kitai mega benung ngiga palan ungkup ngaga TTG di Bintulu. Di Kuching, pengawa ngangkatmanah begunan benung dipejalaika,” ku Fatimah.
 

  • oleh
  • Advertisement