KOTA SAMARAHAN: Nembiak dalam raban B40 enggau M40 di negeri tu dikearap sereta dilalau nguna peluang ngena fasiliti tauka program pelajar ti disediaka perintah Sarawak.
Menteri Muda Pelajar, Inovasyen enggau Pemansang Pengelandik I (Pelajar enggau Inovasyen) Dr Annuar Rapa'ee madahka, perintah nyendiaka mayuh program enggau fasiliti lebih agi ngagai nembiak B40 enggau M40.
Ambika chunto ku iya ke nyadi Chairman Universiti Teknologi Sarawak (UTS), peminta masuk tauka nampung pelajar ba tiga palan pelajar iya nya Universiti Swinburne, Curtin enggau UTS, perintah negeri Sarawak udah ngungkupka 100 iku nembiak B40 enggau M40 belajar ba tiga universiti peribit tu.
"Tang timbal ari bala nembiak iya nya 100 iku ba UTS, 100 iku ba Swinburne enggau 100 iku ba Curtin chukup mimit.
"Aku irau meda timbal ari nembiak tu, sekalika sida enda nemu semua bantu ari perintah tauka sida enda ibuhka fasiliti ke digaga perintah?.
"Bekaul enggau 300 iku nembiak ke dipadah aku tadi, peminta agi mimit. Perintah negeri nengah Yayasan Sarawak meri peluang tauka bantu ti chukup besai ngagai 300 iku nembiak tu," ku iya.
Dr Annuar mansutka penemu tu lebuh iya bejaku seraya bejadi 'Program Outreach Bahagian Kemasukan Pelajar IPTA' (BKPA) Zon Sarawak ti diatur begulai UiTM Pampang Sarawak enggau Politeknik Mukah ba Dewan Jubli, Universiti Teknologi MARA Sarawak, Kampus Samarahan ditu, kemari.
Nya alai Dr Annuar ngasaika program outreach ke diatur UiTM Kampus Sarawak kemari chukup beguna laban agi bisi ke enda bulih penerang bekaul enggau nampung pelajar renggat universiti.
Enti nunda ku iya, dalam timpuh dunya diatu, enda patut nyadi tegal anak kitai enda bulih penerang sekalika jampat tauka lubah enti dibandingka ba taun ke dulu suba.
"Tang agi bisi mega enda nerima penerang ti baka tu, nya kebuah siti aku ngasaika tu bepun ari gaya ruang bilik sida, sekalika apai indai enda beratka pengidup anak jemah ila, tauka apai indai kelalu kiruh ngiga belanja pengidup, ngujungka enda kiruhka gaya pendiau nembiak.
"Aku ngasaika tanggungpengawa apai indai amat beguna. Penyerata bala apai indai dalam program outreach tu amat patut awakka sida meretika pemesai guna pelajar enggau nama fasiliti tauka bantu ke bisi disediaka ngagai bala nembiak.
"Enti nadai penyereta ari apai indai, aku enda ngasaika program outreach tu ke minta nembiak nampung pelajar ba universiti ulih dijapai," ku iya.
Menua lebih agi negeri tu diatu patut nyingkang panjai agi iya nya nempa mayuh agi raban saintis enggau teknokrat.
madahka, laban udah datai ba maya iya menua kitai ukai semina fokus ngagai juruteknik(technician).
Iya ngarapka sida universiti di menua tu ulih nempa nembiak dalam dua bidang nya.
"Kitai diatu patut nyingkang panjai agi iya nya nempa mayuh raban saintis enggau teknokrat sereta professional kelimpah ari jurutekni(technician).
"Dalam kitai mayuh begunaka juruteknik(technician), kitai mega begunaka mayuh agi saintis enggau teknokrat ti lebih mai negeri enggau menua nyingkang ke mua.
"Nya kebuah universiti bejalaika tanggungpengawa ke chukup beguna dalam nempa nembiak ti nyulut," ku iya.