Anda di sini

Patut bisi sistem ke manah agi, kena madahka penyadi ampuh bah

Advertisement
 

KOTA SAMARAHAN: Negeri tu patut ngembuan sistem ti manah agi kena meri penyedar ngagai mensia mayuh lebuh penusah bah nyadi ba endur sida.

Menteri Muda Pelajar, Inovasyen enggau Pemansang Pengelandik I (Pelajar enggau Inovasyen) Dr Annuar Rapa'ee (gambar) madah, laban isu ampuh bah tu isu ke nyadi ninting taun di menua kitai.

Ba penemu iya, isu penusah ampuh bah patut diputarka laban tu meri penanggul ngagai semua.

"Sebengkah pekara patut dipejalaika kena mutarka penanggul tu.Kitai nemu tu penusah ngenyit,tang enti kitai seati segulai kitai patut ulih mutarka penanggul tu kelebih agi enti bekaul enggau nyawa.

"Kitai sinu ati enti bisi bebadi nyawa ketegal penusah ngenyit tu,ti patut ulih diseliahka kitai.

"Aku ngasaika kitai patut bisi sistem ke manah agi bakani deka meri madah tumu ngagai mensia mayuh enggau ngenukuka mensia mayuh bulih signal ti jampat, awakka ulih nerima enda ngira nama bagi penerang ke dituju ngagai sida, lalu sida setuju pindah ngagai palan ngenduh" ku iya.

Dr Annuar mansutka pekara tu lebuh ke bejaku seraya bejadi Program Outreach Bahagian Kemasukan Pelajar IPTA (BKPA) Zon Sarawak ti diatur UiTM Pampang Sarawak begulai enggau Politeknik Mukah ba Dewan Jubli, Universiti Teknologi MARA Sarawak,Kampus Samarahan ditu,kemari.

Ngenang penusah ngenyit ke nyadi di Sibu malam ensanus, Dr Annuar ngarapka mensia mayuh ulih nitihka atur ari raban penerit adat ke ngasuh sida mindah lengkas kena nyeliahka ari sebarang penanggul.

"Bisi maya orang enda nemu pemalat baka penusah ngenyit ba kandang endur sida maya ampuh bah.Pekara ti nyadi tu ambika banding nyadi ba sitak aku di Sibu malam tadi (ensanus).

"Aku enggaika pekara ti nyadi di Selangor (Semenanjuang Malaysia) nyadi di Sarawak laban nyawa ulih diselamat,anang semina ketegal kitai lubah,mensia mayuh enda meretika pemalat pekara ke nyadi ba endur sida,penanggul besai nyadi," ku Kaban Kunsil Nengeri Nangka tu.

Opis Ngemata Gaya Hari Malaysia (MetMalaysia) bisi madah seraya ngelalau semua bekaul enggau ujan ti enda ngetu nyentuk ke ba tikas oren, ba semilan kandang endur di Sarawak berengkah ari 11 ngagai 13 Januari 2022 nyengkaum  di Kuching,Serian,Samarahan,Sri Aman,Betong,Sarikei,Sibu (Sibu enggau Kanowit), Mukah (Tanjung Manis enggau Daro), enggau Kapit (Song).

Ensanus, pelilih menua Sibu nyadi kandang endur keterubah di Sarawak tekeruga ketegal betukar monsun di negeri tu , lebuh 46 iku ari lima buah ruang bilik ba Kampung Seduan Jaya dipindah ngagai Palan Ngenduh ba Dewan Kampung Jeriah,laban rumah sida kena ampuh bah.
 

  • oleh
  • Advertisement