KUCHING: Komiti Mutarka Penusah Ngenyit Negeri Sarawak (JPBNS) enggau semua ejensi ti bekaul di negeri tu udah sedia napi penusah ampuh bah ti nyadi ketegal ujan balat ari Monsun Timur Laut diatu.
Sapit Kepala Menteri Datuk Amar Douglas Uggah Embas ke mega chairman JPBNS madah,nya berindik ari benung nyadi Monsun Timur Laut ti melabaka Sarawak deka betapi enggau ujan bangat ti ngujungka ampuh bah nyadi.
Nya alai ku iya, JPBNS renggat negeri, bagi menua enggau pelilih menua diatu diaktifka lalu bepelasarka peneleba ti mayuh, udah sedia napi sebarang pekara ti nyadi.
"Kami udah nyikap diri napi pekara tu nyengkaum sedia ba penyampau bala pemesai enggau staf, logistik,palan pengenduh (PPS) enggau stuk pemakai.
"Nya alai pagi tu (kemari) JPBNS, nyadi perintah ke bisi tanggungpengawa Gabung Parti Sarawak enggau perintah besai udah nyikap diri, kami udah sedia tauka bejaga kenyau ari bulan November taun nyin tadi, diatu semina ngingatka baru semua residen enggau ejensi ti bekaul.
"Ke sekali tu bisi lapan ejensi deka enggau ngambi bagi nyengkaum 6,705 iku pemesai enggau raban, bekaul enggau logistik bisi 286 bot, 115 lori, 247 perengka pengangkut 4WD, tiga buah helikopter (dua buah) enggai Opis Bomba enggau Penyah Penusah Malaysia Sarawak enggau sebuah enggi Polis sereta perengka pengangkut amfibia," ku iya.
Iya mansutka pekara tu ba aum pengarang berita pengudah nyadi chairman Aum JPBNS ditu kemari.
"Kami mega deka nyendiaka 62i PPS ti ulih endur 185,000 iku orang ke tasah ampuh bah, lalu penyampau PPS deka ditambah nyema bisi pematut," ku iya.
Berebak enggau tu, iya madahka ba kandang menua tauka genturung pendiau ti jauh ari mengeri ke suah ampuh bah, (pasukan tindakan pantas) komuniti ditumbuh deka berati enggau nyaga seraya nganti ejensi ti bekaul datai.
"Tim tauka raban tu udah dilatih sereta diajar chara betapi enggau penusah ampuh bah ba kandang endur tauka genturung pendiau sida sereta tau ngatur peranak pindah ngagai PPS nyema patut pindah," ku iya.
Nambah nya, iya madahka JPBNS bisi numbuhka siti depo besai di Kota Samarahan alai naruh barang ke diguna baka tilam enggau ke bukai, kelimpah ari numbuhka tiga depo mit di Kuching, Samarahan enggau Miri.
Berebak enggau tu Uggah ngelalau rayat kelebih agi ke diau ba kandang endur ke baruh sereta suah kena ampu bah, ngambika seruran bejaga enggau nitihka atur baka pindah ngagai PPS.
"Anang nganti ai niki nyentuk ngagai perabung baru deka pindah, tu udah kelalu balat.
"Ngagai mensia mayuh ke suah kena ampuh bah tu mega patut nyikap enggau naruh dokumen ke beguna enggau barang berega ba endur ke likun," ku iya.
Sama bisi ba aum pengarang berita, Menteri Orang Indu, Nembiak Mit enggau Pemansang Komuniti Dato Sri Fatimah Abdullah enggau ke bukai.