Anda di sini

KM dikearap numbuhka 'Dana Kekayaan Berdaulat Sarawak'

Advertisement
 

MIRI: Pengudah mai Gabungan Parti Sarawak (GPS) nempa pemujur menang sereta merintah baru negeri tu nengah kuasa besai ke diberi rayat, Ketua Menteri Datuk Patinggi Tan Sri Abang Johari Tun Openg dikearap numbuhka 'Dana Kekayaan Berdaulat Sarawak'. 

Dato Sri Lee Kim Shin (gambar) ngarap juluk ati rayat Sarawak meda pengawa numbuhka duit turu pengaya nya,meri pemaik ngagai generasyen Sarawak jemah ila nyadi nyata ari baruh iring Abang Johari. 

Ku Lee, Kepala Menteri udah ngamatka penau iya ngiga jalai pemansut ke penatai pemisi Sarawak nengah pengeraja asal  minyak enggau gis. 

“Nya alai, nyadi juluk besai ati aku iya mega numbuhka Dana Kekayaan Berdaulat Perintah Sarawak asil ari pemansut minyak enggau gis kitai. Nya tau meri pemaik ngagai rebak dudi ila lalu kitai tau mansik model ke sebaka ti dikena di menua Norway lalu ngubah nya nitihka aspirasyen Sarawak,” ku iya.

Iya madahka pekara nya ngagai Utusan Borneo ditu ensana lebuh ke ngenang pasal penyulut ti dijapai Abang Johari beserimbai enggau taun kelima iya nyadi Kepala Menteri Sarawak keenam, pengudah ngangkat sumpah kena 13 Januari 2017. 

Ku Lee, siti agi pekara ti nyadi pemujur Abang Johari ti amat diterima sereta berita manah ke disambut manah rayat Sarawak, lebuh Parlimen sepenemu ngemendarka  ubah ba pengawa ngakun Sempekat Malaysia 1963 (MA63) dalam Konstitusyen Perintah Besai. 

“Tu siri pemujur ti chukup manah laban Sarawak diatu tau betanyaka semua penerang ti dipadahka dalam ripot  Komiti Entara Peintah (IGC), ke mega pansik silik  Ripot Suruhanjaya Cobbold bekaul enggau pinta Sabah enggau Sarawak. 

“Berindik ari ubah nya, nya nyadi pelasar ke tegap ngagai Sarawak kena mulaika pemanah sekeda hak ti udah lenyau tau dirampas sebedau tu,” ku iya. 

Nya alai, kitai semua patut meri sukung enggau kerejasama enggau ati ti penuh ngagai Kepala Menteri ambika nampung pengawa bekaul enggau pekara nya. 

Ku Lee, Sarawak benasit laban bisi siku ketuai ti mayuh peneleba pengelama 40 taun megai negeri Sarawak, udah mangku mayuh bengkah pangku pengawa, ari menteri muda, menteri, sapit kepala menteri neyntuk ke nyadi kepala menteri. 

“Nya alai, Abang Johari bisi pelasar ke tegap amat kena ngiring perintah Sarawak. Tu nyata amat dipandangka dalam prestasi penyulut iya nyadi Kepala Menteri keenam kenyau ari taun 2017. 

"Bulih pemutus ti nyulut ba Pengawa Bepilih Negeri Ke-12 (PRN12) kena 18 Disember taun nyin tadi, rayat Sarawak udah meri kuasa besai ngagai iya awakka terus ngiring sereta ngatur Sarawak,” ku iya. 

Tu PRN Sarawak keterubah ari baruh iring Abang Johari lalu pengawa bepilih keterubah ari baruh GPS pengudah ke ditumbuhka dalam bulan Jun 2018 ti betuaika iya. Nya pemutus ke nyulut laban GPS udah menang 76 ari 82 kerusi ti diperebutka.

“Berindik ari sukung penuh rayat, kami arap amat Sarawak teguh lalu ulih meri fokus ti berat agika pekara ti dikemeratka rayat, pemansang enggau pengelantang rayat. Kami tentu deka chakah gawa begulai enggau iya ngemujurka juluk Sarawak nyapai status negeri bepenatai pemisi besai manggai ba taun 2030. 

“Kepenudi endar, aku ngarapka Kepala Menteri kitai lantang senang lalu di beri pemintar,puh, dedikasi sereta nyulut ngiring Sarawak bulih pemujur ke besai agi dalam mayuh bengkah bidang lalu mai Sarawak lebih progresif sereta teguh,” ku iya. 

Advertisement