SIBU: Taja pan lantang ati laban sesi besekula betunga mua udah berengkah baru kemari, tang bisi sekeda apai indai enda ulih ngelalaika pengirau ati pasal pengelikun anak sida maya besekula.
Nursyikin Awang Ramli, 37, madah taja pan kes ninting hari di Sibu mandangka penyampau ti pemadu mimit, tang virus COVID-19 tetap agi bisi ba mensia mayuh.
Ku iya, pengelekai varian baru Omicron mega mesti dikeibuhka.
"Aku ngaku endang gaga amat ati meda anak aku udah besekula baru (sehari tu) sereta ngepunka sesi belajar betunga mua enggau bala pengajar sida. Taja pia, kami ke nyadi apai indai tetap berasai irau ati laban igi penyakit tu mengkang ngelekai ba mensia mayuh, kelebih agi ba bala anak ti beumur 12 taun kebaruh ti bedau divaksin," ku iya.
Nursyikin di randau pengarang berita Utusan Borneo lebuh nganjung anak iya besekula ba Sekula Primari (SK) Bandaran No. 3 ditu pagi kemari.
Nya alai, Nursyikin ngarapka bala pengajar ulih ngembing bala nembiak sekula nitihka prosedur operasyen standard (SOP) di sekula kena nyeliahka Kluster naydi ti bekaul enggau nembiak sekula.
"Aku ngarapka nengah embing enggau ajar ari bala pengajar, bala nembiak sekula ulih nelebaka diri enggau norma baru diatu," ku iya.
Siku aki, Sanusi Tahir, 63, ti nganjung uchu besekula ba sekula ke, bela berasai irau ati baka Nursyikin.
Iya suah meri jaku tangkan ngagai dua iku uchu iya, awakka seduai ningaka jaku padah ari pengajar sereta anang ningkilka sengkabung idung enggau mulut,enti nadai kebuah.
"Laban ke agi biak, nadai mayuh pekara bekaul enggau SOP ditemu sereta dititihka sida ba sekula. Nya alai, bala pengajar patut amat mantu bala anak nya nitihka SOP sereta nyamin pengelikun sida," ku iya.
Berebak enggau nya, tinjau Utusan Borneo beratika bala pengajar bejaga ba pintu penama sekula lalu nulung meresa tikas pengangat isi sebedau ngemendarka bala nembiak tama ke dalam kelas.
Bala nembiak ke nurn besekula mega mesti ngena sengkabung idung enggau mulut nitihka SOP ti ditetapka.