MIRI: Ubah ari sukut struktur opis menteri digaga ngambika nya setipak enggau nama utai ti udah dilangkar sereta bisi dalam manifesto Gabungan Parti Sarawak (GPS) bepelasarka rikod penyulut.
Sapit Kepala Menteri Datuk Amar Awang Tengah Ali Hassan madah dalam pengawa nusun baru kabinet Sarawak sekali tu, ketuai ke udah bisi peneleba diganti lalu ketuai dalam raban ti baru diangkat.
“Sida tu (ketuai ke baru) ngembuan penemu, pelajar lalu bisi potensial kena kitai nentuka enggau pemisi kaul (menteri ti bepeneleba sereta menteri baru), nya alai kitai bisi siti pelin ti ulih digaga enggau meruan.
“Sida tu nyengkaum Dr Ripin Lamat, sida tu entara raban ketuai ti baru kitai, raban biak lalu udah tentu sida bisi mayuh buah runding.
“Lalu nyema disegulaika sama enggau ketuai ti udah lama, kitai deka bisi rintai ketuai ti ulih neruska pengawa pemansang ungkup pemaik nengeri enggau komuniti kitai semua,” ku iya.
Iya madah munyi nya ba Pengerami Makai Lemai Enggau Ketuai Komuniti ti diatur Palan Servis Kunsil Nengeri (DUN) Lambirdi sebuah hotel tebilang ditu, bedau lama ti udah.
Sama bisi iya nya Speaker DUN Datuk Amar Mohd Asfia Awang Nassar, Menteri Muda Pemansang Orang Dagang ti mega Kaban Kunsil Nengeri (ADUN) Lambir Dr Ripin Lamat, Kaban Parlimen Sibuti Lukanisman Awang Sauni sereta Residen Miri Abdul Aziz Mohd Yusuf.
Beserimbai enggau nya Awang Tengah ti mega Menteri Pengeraja Asal enggau Pemansang Mengeri II sereta Menteri Dagang Antarabansa enggau Betanam Puku madah, diatu tanggungpengawa kabinet ti dichiri iya nya kena nentuka Sarawak terus manah, lantang enggau nama pan ti dilangkar ulih dipejalaika kena ngangkatka pemansang nengeri.
“Tu kena ngangkatka pengelantang idup komuniti kitai ngambika ulih ngemunas, nyangka kitai enda ulih ngemunaska 100 peratus, tang agi ulih ngurangka tikas penyeranta dalam komuniti kitai.
“Tu kebendar nya ti nyadi juluk kena meri peluang semua komuniti enda ngira dini endur sida ngambika ulih ngangkatka pengelantang idup ari sukut pelajar, pengelandik, nambahka sosioekonomi sereta nyaga pengelantang pendiau rayat.
“Tu mega bakani komuniti ulih ngaul diri enggau ngena pun pemisi ke udah dikembuan sida dalam nambahka penatai pemisi ari sukut aktiviti betanam betupi, dagang temuai, dagang mit enggau tengan pemesai sereta semua bidang ti ulih nambahka agi pengelantang idup komuniti,” ku iya.
Nya alai, iya madahka dalam pengawa perintah nyadika nengeri tu sebuah nengeri ti mansang enggau pengelantang idup rayat ulih diangkatka, nya alai kerejasama semua komuniti diguna ngambika nama ti dilangkar ulih dipejalaika.