Anda di sini

Empat kort baru deka digaga di Sarawak, ku Wan Junaidi

Advertisement
Wan Junaidi (dua kiba) lebuh ti ngulu program ngelawa Kompleks Kort Kuching. Sama bisi iya nya Ahmad Terrirudin (kiba) enggau Abdul Aziz (tiga kiba). -Gambar Roystein Emmor
Wan Junaidi (dua kiba) lebuh ti ngulu program ngelawa Kompleks Kort Kuching. Sama bisi iya nya Ahmad Terrirudin (kiba) enggau Abdul Aziz (tiga kiba). -Gambar Roystein Emmor

KUCHING:  Empat kort baru diperambu deka digaga di Sarawak iya nya di Limbang, Sri Aman, Mukah enggau Kapit.

Menteri Parlimen enggau Undang-Undang Datuk Seri Wan Junaidi Tuanku Jaafar madahka perambu ngaga kort baru tu beguna kena nangkup pemayuh kes ti bisi.

“Perambu udah dipadahka ngagai perintah lalu enggau Menteri Besai ke bisi diatu, iya endang ngemeratka pekara tu.

“Pekara bekaul tanah, ulih dikerandau enggau perintah nengeri tauka ejensi perintah bukai lalu ari sukut belanja nya enda kelalu begunaka besai,” ku iya.

Iya madah munyi nya maya aum media beserimbai enggau program ngelawa Kompleks Kort Kuching ditu, kemari.

Kelimpah ngaga kort baru, sebuah rumah rasmi ungkup Akim Besai Kort Tinggi Sabah enggau Sarawak mega deka digaga.

Perengkaguna tu, ku iya ukai semina ungkup pengelantang sereta pengelikun Akim Besai Kort Tinggi Sabah enggau Sarawak tang mega kena nyaga sistem ti bekaul nya empu.

Bekaul program ngelawa nya, Wan Junaidi madahka iya meda endang bisi pematut ngangkatmanah perengkaguna sistem pengawa akim di nengeri tu.

Ku iya, tetiap Indu Opis Bagi Menua mesti ngembuan begunan kort kediri ungkup servis ti manah sereta ngemudahka pengawa kort.

Ari baruh Atur Pemansang Malaysia Lumpar Ke-12 (RMK12) ku iya, perintah udah ngemendarka bisi 14 projek ngangkatmanah, ngemanah sereta nyaga begunan kort di nengeri tu enggau agih belanja RM9 juta lebih.

Projek ngangkatmanah tu ngaul Kompleks Kort Kuching, Kompleks Kort Bintuu, Kompleks Kort Miri, Kort Kota Samarahan, Kort Sibu enggau Kort Sarikei.

Sama bisi iya nya Ketuai Pengerejister Kort Perintah Besai Malaysia Datuk Ahmad Terrirudin Mohd Salleh enggau Sapit Ketuai Direktor (Polisi enggau Pemansang) Unit Pekara Undang-Undang Opis Menteri Besai Abdul Aziz Mohd Johdi.
 

Advertisement