KUCHING: Opis Servis Veterinar Sarawak (JPVS) deka ngesahka kebuah pemati mayuh jani ti ditupi di Durin enggau Bintangor minggu ti deka datai.
Direktor JPVS Dr Adrian Susin Ambud lebuh ti ditanya The Borneo Post kemari madah, pengawa nasat ti diatur sida tetemuka semua jani tu mati kena bulan Disember taun nyin kemari.
“Nadai kes pemati baru diripotka naka sehari tu (kemari),” ku iya seraya nambah kelimpah ari Durin enggau Bintangor, nadai kandang menua bukai di Sarawak tu ngeripotka kes ti sama.
Iya mega nyamin iya nya JPVS seruran matau enggau silik kes baru ti bisi potensial enggau ngatur pengawa matau ti terit ngagai semua palan betupi jani di nengeri tu.
“Kenyau ari taun nyin kemari, nadai ripot pemati ti enda normal di palan nupi jani komersial,” ku Dr Adrian nyemetak.
Nyema kebuah pemati tu ari Tabin Jani Afrika (ASF), Dr Adrian madah, virus tu ukai 'zoonosis', reti nya tu enda ulih ngeruga pengerai mensia lalu enda ulih ngerampit ari jani ngagai mensia.
“Kami deka nyamin ngagai mensia mayuh iya nya makai dagin jani agi likun,” ku iya nambah.
Taja pia, iya ngelalau raban orang ti nupi jani tu ngenegapka biosekuriti palan sida lalu nyeliah meri jani sida makai laluh pemakai tauka laluh pemakai ti bisi dagin.
Raban sida ti betupi tu mega dipinta ngeripotka ngagai JPVS ti besemak nyema bisi sebarang kes pemati ngenyit jani dalam penyampau ti mayuh.
Kelimpah ari nya, sida mega ulih nganjung pesan 'Whatsapp' ngagai lumur 'hotline' iya nya 016-2840918.
Kemari dua genturung pendiau di Bintangor enggau sebuah rumah panjai di Durin ngeripotka pemati mayuh jani sida, enggau pemayuh lebih 200 iku jani ti diripotka mati ketegal penyakit ti dipelabaka bepun ari ASF.