KUCHING: Raban pengatur palan penyangkai kapal nengeri tu patut besedia dalam nyadika palan penyangkai kapal tu moden agi sereta ngena teknologi baru datai ba taun 2030.
Sapit Kepala Menteri Datuk Amar Douglas Uggah Embas madah, kebuah pia laban datai ba taun nya ila, Sarawak nyuluk deka nyadi nengeri ti bepenatai pemisi besai.
“Datai ba taun 2030, tanggungpengawa palan penyangkai kapal tu majak nambah lalu tu mega beguna ngagai nengeri tu.
“Kebuah pia, kitai ngelangkar deka mengeksport mayuh agi produk pemakai ke menua luar,” ku iya maya program ngelawa Palan Penyangkai Kapal Senari ditu kemari.
Uggah mega disempulang Menteri Muda iya Dato Majang Renggi enggau Aidel Lariwoo sereta Sekretari Mendam opis menteri nya Dato Safri Zainuddin maya program tu.
Uggah ti mega Menteri Infrastruktur enggau Pemansang Palan Penyangkai madah, proses nentuka palan penyangkai kapal tu nyadi moden iya nya nyengkaum chara baru ngatur palan nya sereta ngangkatmanah enggau nambahka perengkaguna di tetiap palan penyangkai kapal.
“Peda model palan penyangkai kapal di selampur dunya lalu kitai netapka ikas ba model palan penyangkai kapal ti udah mujur.
“Beserimbai enggau nya, kami di opis menteri deka proaktif dalam pengawa nentuka palan penyangkai kapal di selampur nengeri tu moden agi terus dipejalaika,” ku iya.
Kebuah pia, ku iya, palan penyangkai kapal di nengeri tu ngembuan potensial sereta ulih besemekih enggau palan penyangkai kapal menua bukai.
Dulu ari nya, iya ngatur program ngabas Palan Penyangkai Kapal Senari ti keterubah pengudah dichiri nyadi Menteri Infrastruktur enggau Pemansang Palan Penyangkai Kapal dalam pengawa nusun baru kabinet pengudah Pengawa Bepilih Nengeri Ke-12 (PRN12) bedau lama ti udah.
Bekaul Palan Penyangkai Kapal Senari ti dipejalaika Kaunsil Palan Penyangkai Kapal Kuching (KPA), Uggah nerangka, palan penyangkai kapal tu patut ngiga jalai kena ngangkatka produktiviti.
“Pia mega, sida mesti ngelangkar pelin dalam betapi enggau pgnuji ti baru,” ku iya nambah.