Anda di sini

CENTEXS deka ngatur mayuh macham program latih enggau SEB

Advertisement
 Dr Nadianatra (tiga kiba) begulai enggau temuai dipebasa bukai ngayanka kereban ti dikena ungkup program WAH di CENTEXS kemari.
UNGKUP PENGAWA TI LIKUN: Dr Nadianatra (tiga kiba) begulai enggau temuai dipebasa bukai ngayanka kereban ti dikena ungkup program WAH di CENTEXS kemari.

KUCHING: Palan Penyulut Teknikal Sarawak (CENTEXS) ngelangkar mayuh macham program latih enggau pengelandik begulai enggau Sarawak Energy Berhad (SEB) jemah ila.

Sapit Direktor Industri Akademi CENTEXS Dr Nadianatra Musa madah, tu kena meri pemaik ngagai mensia mayuh kelimpah ari kunteriktor ari baruh pegai SEB.

"Kelimpah nyendiaka program latih kereja di palan ti tinggi ungkup kunteriktor SEB, mayuh agi program ti deka dipejalaika ti sama mega nerima peminta ari pengawa nyambung elekterik ngagai pengawa nyaga kereban elekterik.

"Ungkup penerang, kitai maya tu bisi program baru baka Smart Automation Building ti nyangka ulih disediaka ngagai bala kunteriktor," ku iya lebuh ti ditemu maya program 'Work at Height' (WAH) di CENTEXS ditu, kemari.

Nitih ku iya, sebarang kunteriktor ulih nyereta program tu di CENTEXS ke deka diatur dalam taun tu.

"Tu iya nya pelin kitai kena matih bala kunteriktor dalam nangkup peminta ekonomi digital.

"Nya alai kitai deka madahka ari baruh program industri akademi dalam nentuka mensia mayuh bulih pemaik dalam nama pan pengelandik sereta penemu ari program ke deka disediaka jemah ila," ku iya.

Dulu ari nya, Dr Nadianatra nengah jaku pengelalu iya madahka, bisi 51 iku kunteriktor ari baruh pegai SEB nyereta program 'Work at Height' (WAH) ti diatur pengelama dua hari berunggu berengkah ari kemari.

Program ti diatur tu, ku iya, iya nya kena ngelatih enggau nambahka pengelandik bala kunteriktor dalam sekeda bidang ngambika pengawa sida ulih dipejalaika enggau efektif sereta efisyen.

"Nengah program tu mega, kitai nguji ngenataika penemu ti beguna kena mantu ngemansangka tikas pengulih kunteriktor ti berejister ari baruh SEB dalam bejalaika pengawa sida enggau likun agi.

"Pia mega, kitai deka mekuh ngagai sekeda industri bukai semanjai program tu dipejalaika baka industri ngaga begunan sereta ti bekaul enggau elekterik," ku iya.

Advertisement