KUCHING: Rintai Kabinet Sarawak ke baru iya nya 10 iku menteri enggau 26 iku menteri muda ngangkat sumpah mangku pengawa sida ba mua Tuai Megai Menua ( TYT), Tun Pehin Sri Abdul Taib Mahmud malam ensana.
Pengawa mega keterubah endar diatur nengah chara hibrid (fizikal enggau virtual), Tun Taib bejadi Pengawa Ngangkat Sumpah enggau Nyuaka Surat Chiri mangku pengawa nya nengah 'telepersidangan' ari rumah iya di Demak Jaya,lalu menteri enggau menteri muda, temuai dipebasa ba Dewan Lapau, Dewan Kunsil Negeri.
Pengawa nya diatur sekali tu nitihka prosedur operasyen standard (SOP) kena nyeliahka pengelekai COVID-19, dikemataka Kepala Menteri Datuk Patinggi Tan Sri Abang Johari Tun Openg, Sekrewtari Perintah Negeri Datuk Amar Jaul Samion enggau Speaker Kunsil Negeri (DUN), Datuk Amar Mohd Asfia Awang Nassar.
Pengawa nya diatur pengudah Kepala Menteri mantaika nama rintai kabinet negeri Sarawak kena 30 Disember 2021, iya nya urung dua minggu pengudah Gabungan Parti Sarawak (GPS) menang 76 ari 82 kerusi ba Pengawa Bepilih Negeri Ke-12 (PRN12) 18 Disember 2021.
Sapit Kepala Menteri I Datuk Amar Douglas Uggah Embas ngenulu rintai ba pengawa nya ditangkanka Sapit Kepala Menteri II Datuk Amar Awang Tengah Ali Hasan enggau Sapit Kepala Menteri III Dato Sri Dr Sim Kui Hian.
Nangkanka nya tujuh iku agi menteri iya nya Dato Sri Fatimah Abdullah ke mangku portfolio Menteri Pemansang Orang Indu, Nembiak Mit enggau Pengelantang Pendiau Komuniti nerima surat chiri enggau surat sumpah ditangkanka Dato Sri Dr Stephen Rundi Utom ke nyadi Menteri Betanam Betupi Moden enggau Pemansang Kandang Menua, Dato Sri Abdul Karim Rahman Hamzah (Menteri Dagang Temuai, Industri Kreatif enggau Mandangka Seni sereta Menteri Nembiak, Lumba enggau Main enggau Pemansang Orang Dagang, Dato Sri Lee Kim Shin (Menteri Perengka Pengangkut), Datuk John Sikie Tayai (Menteri ba Opis Kepala Menteri),Datuk Julaihi Narawi (Menteri Utiliti enggau Telekomunikasyen) sereta Datuk Roland Sagah Wee Inn (Menteri Pelajar, Inovasyen enggau Pemansang Pengelandik).
Tembu nya, ditangkanka 26 iku menteri muda ti dikenulu Datuk Francis Harden Hollis, Datuk Dr Jerip Susil enggau Datuk Liwan Lagang.
Udah nya ditampung Datuk Rosey Yunus, Datu Len Talif Saleh Datuk Dr Abdul Rahman Junaidi, Datuk Dr Abdul Rahman Ismail, Datuk Sharifah Hasidah Sayeed Aman Ghazali, Dr Annuar Rapaee; Datuk Dr Malcolm Mussen Lamoh, Datu Dr Penguang Manggil, Datuk Snowdan Lawan, Datuk Abdullah Saidol enggau Dato Sebastian Ting.
Tembu renggat nya, 12 iku agi menteri muda ngangkat sumpah mangku pengawa sida iya nya Datuk Gerawat Gala, Dr Hazland Abang Hipni, Datuk Juanda Jaya, Aidel Lariwoo, Datuk Henry Harry Jinep, Ripin Lamat, Mohamad Razi Sitam, Martin Ben, Dato Majang Renggi, Jefferson Jamit Unyat, Dato Gerald Rentap Jabu enggau Michael Tiang Ming Tee.
Abang Johari udah ngangkat sumpah nyadi Kepala Menteri kena 18 Disember 2021 sereta mantaika rintai kabinet baru Sarawak iya nya 10 iku menteri enggau 26 iku menteri muda ti diselat enggau 12 iku orang baru kena 30 Disember 2021.