SIBU: Keterubah endar pengudah nyauka setaun Kluster Pasai nyadi, Sibu nadai ngerikodka sebarang kes COVID-19, ensana.
ADUN Nangka Dr Annuar Rapaee madah, kena 2 Januari, Sibu semina ngerikodka tiga kes COVID-19.
Taja pia, iya ngelalau mensia mayuh anang ilap tang majak ngasika prosedur operasyen standard (SOP).
“Jaku tangkan aku ngagai semua iya nyaterus ngasika prosedur operasyen standard enggau terit. Tu beguna amat laban bisi varian Omicron, ti beguna semua patut bejejaga," ku iya madah ngagai The Borneo Post ensana.
Ku Dr Annuar, kenyau ari Kluster Pasai nyadi dalam Januari 2021, iya enda ulih tinduk jenak lalu minta peranak Sibu ngaga pengawa kolektif kena nagang pengelekai COVID-19.
Iya mega ngeregaska baru program vaksinasyen mobile kena nentuka mayuh agi orang betuchuk dos 'booster' vaksin COVID-19.
Berebak engagu nya, Pemesai Pengerai Bagi Menua Sibu Dr Teh Jo Hun ngelalau mensia mayuh betuchuk dos booster.
"Aram mih kitai ngelaban lalu ngemunaska COVID-19 tu sekali agi ke pemaik semua," ku Dr Teh.
Kena 3 Januari, kes ninting hari COVID-19 di Sarawak majak mandangka trend nurun pengudah ngerikodka 12 kes.