KUCHING: Sarawak mesti nyendiaka diri napi penambah kes varian Omicron dalam beberapa minggu ke deka datai,pia ku Sapit Kepala Menteri Dato Sri Dr Sim Kui Hian.
Iya melabaka kes Omicron deka nambah dalam dua ngagai empat minggu pengudah varian nya ditemu keterubah endar di negeri tu kena 17 Disember tu tadi.
“Taja pan varian Omicron enda kelalu balat baka varian Delta, baka ti diperatika ari chara berampit di menua tasik, tang penyampau kes ti mayuh tau meri empas ngagai perengkaguna nyaga pengerai sereta ngeruga servis ke beguna amat,enti mayuh orang kena rampit.
“Berebak enggau nya,kitai mega mesti bejejaga enggau varian ‘DelMicron’ (varian Delta begulai enggau Omicron) ari menua ti benung betapi enggau gelumbang varian diatu.
“Nya kebuah, mensia mayuh dilalau betuuchuk dos 'booster' ambika bisi kena nyaga diri,” ku iya madah nengah penerang dalam akaun Facebook iya ditu,ensanus.
Ku Dr Sim, autonomi imigresyen Sarawak beguna amat kena ngelaban COVID-19 tkelebih agi kena nangguhka gelumbang penyakit nya di negeri tu.
“Nya udah meri awak ngagai kitai nyikap diri sereta nyeliahka ari dituntung nasit ke sebaka enggau menua bukai, baka Amerika Syarikat enggau serata Malaysia nyengkaum Sabah,” ku iya.
Ngena peluang tu,iya meri terima kasih ngagai rayat Sarawak ke di dalam enggau luar negeri laban meretika sereta besabar enggau pemar ke ditapi.
“Ulah kita udah nyelamatka mayuh nyawa, engka diri sebilik, bakih tauka bakih ke sama enggau kita kereja diselamatka ari pemati ketegal COVID-19.
“Tu nyata amat mandangka penyerakup Sarawak dalam perang kitai ngelaban COVID-19,” ku Dr Sim ke mega Menteri Pengerai Mensia Mayuh,Pengawa Berumah enggau Kaunsil Kandang Menua.