KUCHING: Sarawak ti betukar ngagai Fasa 4 sehari tu, deka nentuka Pelin Mulaika Pemanah Menua (PPN) dalam sektor industri, dagang, ladang enggau mayuh agi deka berinsur ngagai tikas ti manah ari sukut belanja dibandingka enggau sebedau Atur Nagang Pemindah (PKP) berengkah dipejalaika maya bulan Mac 2020.
Chairman Gerempung Pemansang Pengawa Berumah enggau Reta Tanah Sarawak (SHEDA) Pampang Kuching Dato Sim Kiang Chiok madahka munyi tu laban ari baruh Fasa 4, PPN, semua aktiviti dagang, industri, ladang enggau mayuh agi ulih nyambung baru operasyen dalam kapasiti penuh enti dibandingka enggau maya fasa ke sebedau tu.
Tu ku iya, deka mega nentuka pengeransing, sektor ekonomi di nengeri tu, lalu menua mega deka manah agi setipak enggau Malaysia ti benung nguing ngagai renggat endemik.
"Diatu mayuh macham sektor ekonomi ulih bejalaika operasyen enggau kapasiti penuh, bejalaika industri baru lalu bisi mega ti ulih nyungkak pemansang dagang sida empu.
"Perintah mega ulih nyendiaka mayuh agi bantu kena ngemudahka raban tu bejalaika dagang sida. Tu nyengkaum nyendiaka insentif kena nentuka mayuh agi dagang bejalaika operasyen ba tikas ti pemadu tinggi, minta Bank Negara nenduka penetap peminta nyali duit ari bank komersial kena nentuka sektor ti tekeruga maya pandemik COVID-19 nyamai agi ngaga peminta duit jali ungkup ngenyakahka agi pengawa dagang," ku iya nengah penerang media kemari.
Taja pia, Sim madahka, sekeda industri besai ti ngaul pengawa 3D ('dirty', 'danger' enggau 'difficult') baka sektor begagaka begunan enggau ladang agi meruan betapi enggau penanggul kurang pengereja pengawa.
Iya madahka ketegal ti pengawa nyaga garis entara menua enggau terit ba sekeda menua lalu mesti bejalaika pengawa kuarantin, tu mega meri empas negatif ngagai sektor dagang temuai ke lalu ngeruga pengawa mulaika kapasiti ekonomi menua kelebih agi potensial ti penuh.
"Taja pia, ba penemu aku, betukar ngagai Fasa 4, PPN ungkup Sarawak kena 3 Januari 2022, endang engkeman ba maya nya lalu likun ngagai rayat Sarawak berindik ari lebuh tikas kena rampit ninting hari COVID-19 baruh sereta tikas vaksinasyen nyengkaum 'dos penggalak' entara rayat nengeri tu, tinggi.
"Berindik ari nya, enggau pemisi varian baru, Omicron, kitai semua patut terus ngemeranka pengawa bejejaga kena nagang statistik kes kena rampit ti niki baru lalu tu ulih nentuka pemutus atur nagang pemindah diteritka baru," ku iya.
Menteri Kanan Penyaga Pebngelikun, Datuk Seri Hishammuddin nengah penerang kena 31 Disember 2021 madahka Sarawak enggau Kelantan ke diatu ba Fasa 3 Pelin Mulaika Pemanah Menua (PPN) ke betukar ngagai Fasa 4 berengkah 3 Januari (sehari tu).
Nitih ku iya, pemutus tu digaga pengudah beratika risiko ti benung nyadi ke dipejalaika Opis Menteri Pengerai Malaysia (KKM) sereta Kaunsil Pengelikun Menua (MKN).
"Prosedur Operasyen Standard (SOP) ungkup nengeri ti udah ba Fasa 4 iya nya sama enggau sebedau tu," ku iya.