BAU: Gabungan Parti Sarawak (GPS) ti menang besai dalam Pengawa Bepilih Nengeri Ke-12 (PRN12) nyin tadi ngayanka rayat nemu bekaul polisi ti dikemeratka perintah GPS.
Kepela Menteri Datuk Patinggi Tan Sri Abang Johari Tun Openg (gambar) madah, iya ngembuan polisi nyentuk ngagai taun 2030 iya nya deka nentuka Sarawak nyadi nengeri mansang bepenatai pemisi tinggi nengah ekonomi digital.
“Terima kasih ngagai rayat laban udah meretika polisi tu. Nyema bedau nemu, enda patut sida meri sukung ti kuat ngagai GPS.
“Pemenang bulih 76 kerusi iya nya siti pemujur ti bedau kala dijapai dalam sebarang pengawa bepilih sebedau tu.
“Aku nyadi Chairman GPS meri besai terima kasih ngagai sukung ti chukup kuat ari rayat ngagai GPS dalam Pengawa Bepilih Nengeri Sarawak Ke-12 (PRN12) nyin tadi,” ku iya.
Iya madah munyi nya lebuh ti bejaku maya pengerami Ngintu Ari Pengada Ke-65 Taun Opis Kaunsil Pelilih Menua Bau di Tasik Biru Food Village ditu, kemari.
Sama bisi datai Pemangku Sekretari Nengeri Dato Sri Abu Bakar Marzuki enggau Chairman Opis Kaunsil Pelilih Menua Bau ti mega Pemesai Pelilih Menua Bau Anielia Siam sereta bala bukai.
Ku Abang Johari nambah, GPS ti menang besai iya nya siti mandat ti chukup kuat sereta tanggungpengawa ti besai ke diberi ngagai iya sereta bala bkaih ke bukai dalam GPS.
Enggau pemenang tu, ku iya ketuai GPS patut terus bebendar ngemansangka nengeri Sarawak enggau rayat ngambika bediri sama tinggi, duduk sama baruh enggau orang bukai.
Abang Johari mega beterima kasih ngagai selampur rayat di Tasik Biru laban udah nentuka GPS bulih menang besai.
Pia mega enda tinggal peranak di sitak Tanjung Datu, Opar, Serembu ti udah nentuka GPS menang.
Abang Johari mega nyamin iya nya GPS deka bejalaika semua 34 pekara dalam manifesto dalam timpuh lima taun tu.
Tu nyengkaum nembuka perengkaguna infrastruktur jalai, ai, elekterik enggau Internet.
Pengudah perengkaguna infrastruktur tu mujur ditembuka dalam timpuh lima taun tu, ku iya, perintah GPS deka ngangkatka program inovasyen sereta pemansang pengelandik Sarawak.