KUCHING: Presiden Parti Bersatu Rakyat Sarawak (SUPP) Dato Sri Dr Sim Kui Hian (gambar) dichiri nyadi Sapit Kepala Menteri.
Pekara tu dipadahka Kepala Menteri Datuk Patinggi Tan Sri Abang Johari Tun Openg ba Aum Pengarang Berita Khas ti diatur ba Wisma Bapa Malaysia ditu kemari.
Abang Johari mega madahka Datuk Amar Douglas Uggah Embas enggau Datuk Amar Awang Tengah Ali Hasan, agi nyadi Sapit Kepala Menteri.
SUPP dipilih bisi pengari mangku pengawa nyadi Sapit Kepala Menteri berindik ari menang ba semua 13 sitak ti dipenggi ngagai parti tu maya PRN12 kena 18 Disember 2021.
Kelimpah ari Sapit Kepala Menteri, Dr Simmega nyadi Menteri Pengerai Mensia Mayuh, Pengawa Berumah enggau Kaunsil Kandang Menua.
Nambah nya SUPP dalam kabinet baru tu mega diarika Dato Sri Lee Kim Shin ke nyadi Menteri Perengka Pengangkut enggau tiga iku ti nyadi Menteri Muda iya nya Dato Sebastian Ting (Menteri Muda Dagang Temuai, Industri Kreatif enggau Mandangka Seni I (Arts)), Datuk Francis Harden Hollis nyadi Menteri Muda Pelajar, Inovasyen enggau Pemansang Pengelandik II enggau Michael Tiang Ming Tee (Menteri Pengerai Mensia Mayuh, Pengawa Berumah enggau Kaunsil Kandang Menua.
SUPP sebuah parti ke pemadu tuai di Sarawak ti ditumbuh dalam taun 1959, maya PRN12 tu tadi mujur ngerebut baru sitak Bukit Assek, Kota Sentosa, Pelawan, Tanjung Batu enggau Pujut ke lama udah ari baruh dipegai Parti Tindakan Demokratik.
Nambahka nya SUPP mega menang ba sitak Opar, kelimpah ari mujur ngetanka Batu Kawah, Batu Kitang, Simanggang, Repok, Meradong, Senadin enggau Piasau.
Kepenudi endar Presiden SUPP mangku pengawa nyadi Sapit Kepala Menteri iya nya ari taun 2006 ngagai 2011, iya nya Tan Sri George Chan Hong Nam.
Apai Dr Sim, Tan Sri Sim Kheng Hong mega kala mangku pengawa tu ari taun 1974 ngagai 1991, sebedau disandang Tan Sri Wong Soon Kai.
Sebedau PRN12 diatur, mega bisi tiga iku Sapit Kepala Menteri iya nya Datuk Amar Douglas Uggah Embas, Datuk Amar Awang Tengah Ali Hasan, Niang Tan Sri Datuk Amar James Jemut Masing. Masing midang ba bulan Oktober tu tadi.