LIMBANG: Rayat agi begunaka pemansang diteruska ari baruh pegai perintah Gabungan Parti Sarawak (GPS) ke lalu nentuka bulih menang besai maya Pengawa Bepilih Nengeri Ke-12 (PRN12) nyin tadi.
Kaban Kunsil Nengeri (ADUN) Bukit Kota Dr Abdul Rahman Ismail madah, pemenang tu kelai ti nyata rayat di Limbang terus meri sukung enggau pechaya ngagai parti nya enggau ngarapka pemansang ulih diteruska.
“Kitai deka bebendar neruska semua projek pemansang ngambika DUN Bukit Kota sereta mega pelilih menua Limbang deka mansang dalam Sarawak,” ku iya lebuh ti nyuaka chek Projek Mit Menua Pesisir (MRP) ngagai gerempung enggau kelab ukai dikuasa perintah ba sitak DUN Bukit Kota bedau lama ti udah.
Sama datai iya nya Penulung Pemesai Opis Pelilih Menua Limbang Hamidah Halpi, pengari Polis Diraja Malaysia (PDRM) Limbang Inspektor Edrizan Abdul Rauf, Ketuai Opis Bomba enggau Penyelamat Malaysia (JBPM) Zon Tujuh Limbang Awangku Mohd Hazmin Awang Zainal enggau Penghulu Chua Beng Soon.
Maya pengerami nya, Dr Abdul Rahman udah nyuaka chek MRP 2021 sepenyampau RM525,000 ungkup 104 kelab sereta gerempung ukai dikuasa perintah (NGO) di pelilh menua Limbang.
Ku iya madah agi, pemenang tu iya nya ngayanka rayat Sarawak nemu enggau nyata visyen enggau misyen ti dipegai Kepala Menteri Datuk Patinggi Tan Sri Abang Johari Tun Openg.
Iya mega beterima kasih ngagai bala pengundi di sitak DUN Nukit Kota laban ti udah milih iya maya PRN12 Sarawak bedau lama ti udah.
“Rayat di DUN Bukit Kota tu endang ngarapka pemansang ti meruan ungkup pemaik sereta pengelantang peranak jemah ila.
“Semua projek pemansang ti benung dipejalaika kitai sereta deka dipejalaika jemah ila ngambika Limbang ulih terus mansang dalam Sarawak,” ku iya.
Ku iya madah, pemansang tu iya nya ngaul perengkaguna pemun baka bekal elekterik, ai, jalai alun enggau telekomunikasyen ti dilangkar sereta deka dipejalaika nyentuk taun 2025 lalu deka ditambahka enggau pemansang ekonomi iya nya lima taun sebedau nyapai juluk nengeri mansang bepenatai pemisi tinggi maya taun 2030.
Dr Abdul Rahman mega ngena awak tu meri besai pengaga ati sereta tabi basa ngagai Abang Johari tu mujur megai GPS udah menang 76 ari 82 kerusi DUN ti diperebutka.