KUCHING: Beri peluang ngagai Kepala Menteri Datuk Patinggi Tan Sri Abang Johari Tun Openg nentuka rintai kabinet perintah negeri iya ke baru.
Kaban Kunsil Negeri Asajaya, Dato Sri Abdul Karim Rahman Hamzah (gambar) madah, numbuhka kabinet negeri nya hak prerogatif Kepala Menteri.
"Kitai patut meri peluang ngagai kepala menteri ngaga pemutus sereta anang ngaga pengawa ngelakuka diri.
"Nya hak prerogatif Kepala Menteri, enti aku nadai diengkah enda ngira bagi opis menteri, nyadi ADUN aja pan enda ngawa," ku iya madah ngagai pengarang berita pengudah bejadi pengerami Apresiasyen Opis Menteri Nembiak,Lumba enggau Main ditu, malam ensanus (Hari Dua).
Abdul Karim mansutka pekara nya lebuh ditanya raban pengarang berita bekaul enggau opis menteri ke dipelaba diberi ngagai iya.
Abang Johari ti mega Chairman Gabungan Parti Sarawak (GPS) ngangkat sumpah nyadi Kepala Menteri kena 18 Disember 2021, pengudah menang besai ba pengawa bepilih negeri Ke-12 apin lama.
Nyentuk ke seharitu, Abang Johari bedau mantaika rintai kabinet negeri iya ke baru.
Bekaul enggau pengerami nya, Abdul Karim ngarapka taun baru deka lebih manah agi ngagai opis menteri ngatur mayuh bengkah program kena ngenyemakka enggau raban nembiak.
"Tu mega nyengkaum napung baru pengawa ke udah dipejalaika opis menteri nya sebedau tu baka ngatur program 'Jelajah Belia Sarawak' di serata negeri tu," ku iya.
Ba pengerami tu, iya nyuaka 'Anugerah Perkhidmatan Cemerlang' ngagai 39 staf Opis Menteri Nembiak, Lumba enggau Main sereta tepa ngagai 15 staf ti deka pinchin enggau lima pelatih Latihan Pengukuhan Graduan Sarawak (GETS).
Iya mega bejadi bup Prosedur Operasyen Standard Program Rekreasyen Luar ari Kem Belia Sarawak.