MARUDI: Ketuai raban bansa di Baram dekaka Kaban Kunsil Negeri (ADUN) Marudi Datu Dr Penguang Manggil (gambar) dichiri nyadi menteri penuh dalam kabinet baru perintah Sarawak.
Ketuai raban bansa nya, Pemancha Enggah Muga ngarika raban bansa Iban pelilih menua Beluru, Pemancha Jamel Sabil (Melayu pelilih menua Marudi/Baram), Pemancha Wong Kiong Ching (China pelilih menua Marudi/Baram), Penghulu Patrick Jeleman (Orang UIu pelilih menua Beluru) enggau Penghulu Larek Mat (Penan pelilih menua Beluru).
Sida nyukung penuhnya awakka Penguang diberi peluang untuk mangku pengawa nya pengudah Gabungan Parti Sarawak (GPS) menang besai ba Pengawa Bepilih Negeri Sarawak Ke-12 (PRN12).
“Kami deka minta ngagai Kepala Menteri Datuk Patinggi Tan Sri Abang Johari Tun Openg ngena 'hak istimewa' iya milih Penguang nyadi menteri penuh dalam rintai menteri baru ila,” ku sida madah nengah penerang begulai,kemari.
Ba PRN12, GPS udah menang 76 ari 82 kerusi DUN ti diperebutka.
Ku sida, pengawa nyiri Penguang nyadi menteri penuh endang bepelasarka sekeda justifikasi ti beguna amat.
“Iya kamerah amat bekerejasama sereta begulai enggau semua serak rayat enda ngira jalai pengarap, bansa usul lalu iya bepegai ba prinsip semengat gawa dalam siti tim.
“Tu mega dipandangka nengah pemujur iya menang ba PRN12 enggau majoriti ti amat besai, taja pan betapi enggau mayuh macham jaku tuduh enggau taktik kamar orang ke nyatup iya,” ku sida.
Kelimpah ari nya, Penguang mega mandangka prestasi ti nyulut lebuh ke mangku pengawa nyadi menteri muda kenyau ari taun 2016.
“Nyadi peranak asal di Baram, iya nemu amat utai ke diguna enggau isu ke ditapi peranak ditu. Kami arap amat Kepala Menteri deka berundingka peminta kami ienggau pemintar, ke pemaik pengidup raban bansa di menua pesisir enggau ulu entigis Sarawak jemah,” pia ku penerang nyat.