KUCHING: Pakatan Harapan (PH) enda kala ngelengkaka pemerat Sarawak lebuh ti nyadi perintah di renggat perintah besai taja semina dalam timpuh 22 bulan.
Chairman PH Sarawak, Chong Chieng Jen madahka lebuh PH nyadi perintah, Ubah Konstitusyen ungkup Pekara 1(2) Konstitusyen Perintah Besai dibantaika dalam aum Parlimen kena nentuka pengeransing mulaika baru status asal Sabah enggau Sarawak ari baruh Sempekat Malaysia 1963 (MA63).
Taja pia, ku iya, pengawa ngubah Pekara 1(2) Konstitusyen Perintah Besai enda mujur laban ti nadai sukung majoriti dua pertiga dalam Parlimen laban (kaban parlimen) Gabungan Parti Sarawak (GPS), PAS enggau UMNO selubang sepenemu enda setuju.
"Rang undang-Undang (RUU) tu udah dikemendarka dua taun ti udah iya nya maya 2019 nyema kaban parlimen ari tiga parti tu sengaja ngachau undi.
"Nyadika penambah, ari baruh PH mega 17 ari 21 pekara mulaika hak Sabah enggau Sarawak baka ti bisi dalam MA63 udah diputarka Komiti Kabinet maya nya.
"Tang sayau, perintah PH badu enda lama udah nya. Nama pan ti mujur dijapai kami (Perintah PH) dalam timpuh 22 bulan nya, semua lalu habis," ku iya maya aum media di Indu Opis Parti tindakan Demokratik (DAP) Sarawak ditu kemari.
Chong ti mega Chairman DAP Sarawak madahka perintah PH enda kala ngetuka projek Jalai Besai Pan Borneo tang semina ngetuka Bakih Bejalaika Pengawa Projek (PDP) ti dipeda endang nadai pematut.
Pemutus tu, ku iya, udah ngujungka Malaysia ngelimat nyau deka RM3 bilion lalu penyampau tu ulih dikena dalam bejalaika mayuh agi projek lalu ulih meri pemaik ngagai rayat Sarawak.
"Perintah besai ari baruh PH mega udah ngagihka RM1 bilion kena nyeruri lebih 1,000 sekula repuk di menua pesisir Sarawak enggau pengawa ngemanah tu diatur Opis Kereja Raya (JKR) Sarawak.
"Isu diatu iya nya perintah GPS Sarawak udah salah guna agih belanja tu kena ngaga dua sekula enggau ungkus ti kelalu besai, meri penguntung ngagai kunteriktor raban sida," ku iya.
Nyadika chunto, ku iya, dalam Bajet Nengeri (Sarawak) 2020, GPS ngagihka RM29.5 juta ungkup Sekula Primari (SK) Ulu Segan BIntulu, sebuah sekula primari ke semina bisi 250 iku nembiak lalu RM35.7 juta ungkup SK Maludam, ti semina bisi 350 iku nembiak.
Chalun ungkup kerusi DUN Padungan tu madahka dalam timpuh kurang dua taun, PH udah ngelipat gandaka geran ninting taun Sarawak ari baruh Pekara 112D- enggau pelin deka ngelipat gandaka dalam timpuh lima taun.
Kelimpah ari nya, PH ngangkatka Belanja Pemansang Sarawak ngagai RM4.4 bilion ba taun 2020, 40 peratus lebih ari nama ti diberi Barisan Nasional (BN) ngagai Sarawak , ku iya nambah.
"Ukai semina nya aja, PH udah ngetuka polisi BN ti enda nyagio ngimport gula. Ukai baka BN ti mejal pengeluar F&B (pemakai enggau ai irup) di Sarawak meli gula ari Malaysia Barat ba rega ti jauh tinggi agi, PH ngemendarka sida ngimport gula ari menua luar ba rega ti murah agi sereta ngelimatka ungkus dagang.
"Berindik ari nya, enda dikeenggaika PH seruran komited ngenegapka sebana Sabah enggau Sarawak lalu bebasaka dua nengeri tu ti nyadi bakih kunsi sama bela dalam Malaysia," ku iya.
Sama bisi datai chalun kerusi DUN Pending Violet Yong, chalun kerusi Kota Sentosa Micheal Kong, chalun kerusi Batu Kawah Dr Kelvin Yii enggau chalun kerusi Batu Kitang Abdul Aziz Isa.