SIBU: Parti Sarawak Bersatu (PSB) deka ngelancharka manifesto pengawa bepilih parti sereta mantaika ba semua surat berita dalam bemacham bansa jaku, 9 Disember tu.
Presiden PSB Dato Sri Wong Soon Koh madah, manifesto nya bisi ngenang pasal tanggungpengawa berat ti mesti di pejalaika PSB ungkup ke pengelantang rayat Sarawak.
"Rayat Sarawak bisi hak ba pengidup, peluang kereja, penatai pemisi, pelajar, pengelikun, nyaga pengerai,alai diau,pemansang enggau projek pemansang nyengkaum rampa pendiau ngelingi ke meruan agi.
"Rayat mega dekaka bala anak sida ulih besai enggau manah sereta ngembuan pengidup meruan agi enti dibandingka enggau sida apai indai empu.
"Juluk ati rayat ungkup pengidup ke meruan agi endang batang misyen enggau komitmen PSB.Nyaguka pengidup enggau pengelantang rayat endang nyadi batang tuju kami," ku iya madah ba aum media ba Opis PSB Bawang Assan,kemari.
Sama bisi datai maya nya,chalun PSB DUN Dudong Wong Hie Ping, Andrew Ting (Bukit Assek,Dr Low Chong Nguan (Pelawan) enggau Intanurazean Wan Sapuan Daud (Nangka).
Wong ke bediri minta pilih ba DUN Bawang Assan madah,PSB deka magi pengaya Sarawak enggau rurus agi ngagai semua rayat.
Bebida enggau perintah ke sebedau tu ku iya,ti melanjaka bebilion-bilion ringgit ngagai projek besai ti enda patut sereta nadai meri pemaik sechara terus ngagai rayat.
"Projek tu tau digaga dalam lima tauka 10 taun ke dudi ila tang pekara ti patut dikemeratka kami iya nya pengidup enggau pengelantang rayat kelebih agi pengudah menua ditempuh pandemik COVID-19," ku iya.
Ngelansa pasal manifesto PSB,Wong madahka manifesto deka ngenang pasal semua pekara nyengkaum ekonomi, sosial, pengelikun enggau pengelantang semua rayat Sarawak.
Dalam manifesto ku iya, tetiap iku orang lunggar umur ti enda dapat agi enggau peranak Sarawak ti timpang pendiau ke begunaka intu siru,deka diberi elawin nyaga sepenyampau RM1,200 sebulan.
"Kena meransang sida awakka ulih ngatika diri enggau nyaga nama manah sida, orang lunggar umur ti patut deka diberi belanja kena beridup sepenyampau RM600 sebulan enggau diberi 'status istimewa' awakka ulih ngasaika diskaun enggau bantuan dalam pengidup ninting hari sida," ku iya.
Kelimpah ari nya,PSB mega mantaika Endowmen tauka bantu ungkup nembiak mit kena meransang rayat Sarawak diau mendam sereta ngemesaika bala anak sida di Sarawak.
"Bantu ngibun RM200 sebulan bungkup tetiap nembiak mit ke baruh umur tiga taun lalu RM300 sebulan ungkup tetiap iku nembiak mit ke beumur entara tiga ngagai lima taun.
"Ungkup nembiak mit ke ngelui ari lima taun tang baruh ari 18 taun, deka diberi RM500 sebulan tetiap iku sida," tambah Wong.