SARATOK: Entelah sentang kuing penyandang kerusi dua penggal Kunsil Nengeri (DUN) Krian, Datuk Ali Biju udah ditemu pengudah iya ngenukuka diri bediri nyadi chalun Ngatika Diri ba Pengawa Bepilih Ke-12 (PRN12) ke sekali tu.
Ku Ali, iya ngaga pemutus ngenanka kerusi DUN Krian ketegal peminta rayat ari renggat nembiak redah ba DUN nya, ti dekaka iya bediri minta pilih baru ngenanka kerusi ti dimenangi maya PRN10 enggau PRN11.
"Pemutus ke diambi nya endang ketegal bebasaka sukung enggau peminta rayat ba renggat nembiak redak ti dekaka aku bediri minta pilih ngenanka kerusi tu.
"Dalam PRU12 ba DUN Krian tu, aku nediri minta pilih nyadi chalun Ngatika Diri sereta ngena lambang 'Kerusi'," ku Ali lebuh dirandau media sepenembu proses ngantung nama chalun,kemari.
Proses ngantung nama chalun ungkup DUN Krian udah diatur ba Dewan Sri Krian ti dibuka pukul 9 pagi.
Nyaut tanya ari media bekaul status iya enggau Parti Bersatu, Ali madahka pekara deka dirandau enggau presiden parti udah tu ila.
"Aku arap amat ba maya ke diatu presiden parti udah nemu pasal pemutus ke diambi aku.
"DUN Krian tu nyelai, rayat ditu lebih beratka personaliti chalun ari parti ti diarika sida," ku Ali.
Dalam PRN12 tu, DUN Krian deka diperebutka empat penyuru iya nya Ali Biju ti bediri Ngatika Diri, Friday Belik (GPS), Musa Dinggat (PSB) enggau Danny Kuan (PBK).
Ketuai Pemesai Pengawa Bepilih DUN Krian Bilong Engkas udah mantaika nama chalun ke bediri minta pilih pukul 10.50 pagi.
Maya Pengawa Bepilih Nengeri Ke-11 (PRN11) suba, kerusi DUN Krian diperebutka dua penyuru, ke alai Ali udah menang ngarika PKR enggau penyampau undi 5,388 undi, lalu orang ti nyatup iya Kilat Beriak ari parti BN semina bulih 3,748 undi.