BINTULU: Enti Parti Sarawak Bersatu (PSB) diberi peluang, ba runding aku pengawa ngaga projek besai patut ditangguh dalu dalam lima ke 10 taun ti deka datai, laban ba maya ke diatu pekara ti patut diberi fokus iya nya ngangkatka tikas pengidup rayat, pia ku Presiden Parti Sarawak Bersatu (PSB), Dato Sri Wong Soon Koh.
Nya alai ku iya, kami mai polisi deka nyendiaka ngagai tetiap iku anak enggau ruang bilik pun penatai pemisi ninting bulan enggau ninting taun kena ngangkatka tikas pengidup sida enggau penatai pemisi tetiap ruang bilik.
Ku iya,nengah chara nya rayat tau idup enggau meruan agi lalu udah tentu polisi nya meri pemaik terus ngagai rakyat.
"Kami bulih inspirasyen tu ari (Niang) Tok Nan (Tan Sri Adenan Satem) ke alai polisi iya meri pemaik terus ngagai rayat.
" Nya alai kami deka nunda legasi iya, mantaika polisi ti meri pemaik terus ngagai semua rayat.
"Tetiap patut bisi pengidup ke meruan agi di Sarawak.
"Penatai pemisi ke manah agi, peluang kereja enggau pelajar ke manah agi,perengkaguna pelajar, pengerai, rumah,gaya pengidup ti meruan agi sereta kondusif enggau ke bukai," ku iya lebuh ke dirandau pengudah mantaika PSB DUN Tanjong Batu maya pengerami merarau ba restoran di Tanjong Batu,kemari.
Ku iya, tu mih antara ti dikedekaka rayat lalu kami ngarapka ulih nangkup juluk ati rayat ti deka bisi pengidup ke baka nya, lalu kami nguji ngemujurka nya.
"Tu mega beguna amat ke PSB,projek besai enggau ke bukai nya tau dudi dulu, bisi pekara ke berat agi ti patut diduluka," ku iya.
Ku iya, gaya idup rayat perlu mesti dikemeratka kelebih agi pengudah pandemik COVID-19, mayuh rayat napi pemar ba pengawa dagang, penatai pemisi, kereja,nadai penatai pemisi enggau ke bukai, nya alai kami ngarapka bebendar ngangkatka pengidup semua rayat kelebih agi pengudah pandemik tu.
"Aku tau madahka pengidup rayat nadai belinsur manah laban semina 10 nyentuk 30 peratus raban elit ke bisi kenyau ari 58 ta ke udah, tang majoriti rayat mengkang seranta taja pan Sarawak sebuah nengeri ti pemadu kaya, sereta amat mayuh pengeraja asal.
"Aku udah neresa nengeri tu ari selatan ke utara dalam 60,000 batu ari tetiap sukut Sarawak, aku meda kediri empu pengidup rayat tinggal pemansang kelebih agi ba kandang menua ulu entigis enggau menua pesisir.
"Nengah jalai kompeni kayu batang, jalai ladang, kekadang aku ngena bangkung semanjai sungai ngelawa genturung pendiau enggau ke bukai,"ku iya.
Ku iya, ba aku pekara ke baka enda ulih diterima, pengudah 58 taun merdeka lalu nadai infrastruktur ba endur nya,bekal ai, elekterik, bungkur enggau servis internet mega nadai ba endur nya.
Nya alai ku iya, iya ngarapka perintah ke diatu ti bisi ati ngemansangka projek besai tauka sekeda projek ti pemadu besai nyengkaum projek ke enda patut ti nadai meri pemaik terus ngagai semua rayat, patut ditangguhka dulu.