SIBU: Perintah nengeri ari baruh pegai Gabungan Parti Sarawak (GPS) deka semampai komited ngangkatka kualiti pelajar di Sarawak enggau ikas pengelandik ba jaku Inggeris ba bala nembiak sekula,pia ku Kepala Menteri Datuk Patinggi Tan Sri Abang Johari Tun Openg.
Lebuh ti netapka pekara nya, Abang Johari madah kelimpah ngatur program ti ditujuka ngagai ketuai ba sekula,pengajar enggau nembiak, perintah Sarawak mega bisi nyendiaka bantu kena ngemansangka infrastruktur di sekula.
"Pengawa nya enggau inisiatif udah dipejalaika sereta mengkang dipajakka kena nambahka kondusif enviromen ngajar enggau belajar di sekula.
" Tu nyengkaum ngaga baru enggau ngangkatmanah begunan sekula ti udah repuk sereta nyendiaka perengkaguna baka nyambung elekterik enggau ai beresi ti tau dikearapka,kelebih agi ngagai sekula di menua pesisir.
"Bantu kami ukai semina naka ngagai pengajar aja tang mega ngagai bala nembiak sekula.
"Kami nyendiaka kereban baka bup teks, bup kereja enggau kereban dikena ngajar enggau belajar bukai dikena nembiak sekula belajar," ku iya lebuh bejadi bejadi Simposium Pelajar Jaku Inggeris Sarawak (SELES) 2021 ditu, kemari.
Teks jaku Abang Johari dibacha Menteri Pelajar, Sains enggau Pansik Teknologi Datuk Amar Michael Manyin Jawong nengah Zoom ngarika Kepala Menteri maya pengerami nya dalam mod hibrid.
Bisi 180 pesereta di serata nengeri enggau ba SELES edisyen kelima tu ti udah diatur kenyau ari Hari Tiga tu tadi, ke alai bisi 30 Opis Pelajar Pelilih Menua (PPD) di nengeri sama bisi nganjung enam iku pengajar.
Berebak enggau nya, Abang Johari muji Opis Menteri Pelajar, Sains enggau Pansik Teknologi (MESTR) laban udah ngambi inisiatif ngatur SELES nengah chara hibrid iya nya fizikal enggau nengah online.
Ku iya, kelimpah SELES opis menteri nya udah ngatur mayuh bengkah program baka nambahka pengelandik pengajar enggau ketuai sekula, bejalaika pengawa ngajar Sains enggau Matematik dalam Jaku Inggeris di Sarawak, nyendia kereban kena ngajar enggau belajar dikena negapka STEM (Science, Technology, Engineering enggau Matematik) enggau Pelajar Jaku Inggeris di sekula nyegkaum ngangkatka ICT enggau pelajar digital di sekula.
Kelimpah ari nya ku iya, berengkah ari MCE (Sijil Pelajaran Malaysia) diketuka, jaku Inggeris nyadi jaku ti dikena ninting hari dalam taun 1976, tikas jaku Inggeris di Sarawak udah majak nurun, lalu tu ngeruga penau ngulihka kereja.
"Nya alai, endang patut amat kitai ngubah 'trend' tu lalu ambika tu tau nyadi, pelajar Jaku Inggeris endang beguna amat kena nentuka tikas jaku Inggeris di Sarawak ditikika baru maya penyulut jaku nya suba," ku Abang Johari.
Ku iya baru, patut dikemeratka mega Jaku Inggeris mega nyadi jaku rasmi di Sarawak kelimpah ari Bahasa Melayu.
Nya alai, perintah Sarawak udah numbuhka Sekolah Menengah Antarabangsa Yayasan Sarawak di Petra Jaya, Kuching ti dipelaba beroperasyen dalam kandang bulan Mac tauka April 2022, ku iya.
Ku Kepala Menteri, batang tuju sekula antarabansa tu endang kena meri peluang ngagai raban ari menua pesisir tauka ruang bilik ti ngembuan penatai pemisi mit (B40) ngembuan pelajar ke bekualiti sereta holistik betikas antarabansa.
"Nya alai Sekula Antarabansa tu ngena silibus pelajar antarabansa ti diberi nama kurikulum International General Certificate of Secondary Education (IGCSE)," Ku iya.
Ngena peluang nya, iya mega ngenataika pengaga ati ngagai MESTR laban udah ngatur simposium tu, seraya muji kerejasama enggau Opis Pelajar Nengeri nya.
"Beratika rikod prestasi nya kenyau ari taun 2017, SELES patut diteruska jmah ila laban tu meri asil enggau empas positif ukai semina ngaga pengajar Jaku Inggeris tang mega ngagai nembiak sekula," ku iya.