KUCHING: Manifesto ti bebida entara parti dalam Pakatan Harapan (PH) Sarawak ba Pengawa Bepilih Nengeri Sarawak Ke-12 (PRN12) enda nyadi ke penanggul, pia ku Direktor Pengawa Bepilih PKR Sarawak, Dominique Ng.
Ku Ng, Pakatan Harapan ditumbuhka ari mayuh bengkah parti lalu tetiap parti bisi manifesto kediri empu ti ukai nyadi isu ba sida dalam PH.
“Taja pan DAP bisi manifesto kediri empu tetapi kami bekunsika visyen ke sama ba renggat nasional.
“Lalu ditu (Sarawak) kami bediri minta pilih ngena logo diri empu lalu n ya mega enda nyadi isu.Nya ukai reti kami enda meretika pangandiri tang di Sarawak kami ngereja nya engagu chara ke bebida,” ku iya lebuh ke bejaku maya aum media ba Indu Opis PKR ditu, kemari.
Bekaul perambu ngubah Pekara 1 (2) baka ti diungkupka dalam Rang Undang-Undang Konstitusyen Perintah Besai (Ubah) 2021 kena mulaika reti leka jaku Nengeri-Nengeri Borneo ungkup Sabah enggau Sarawak, Sekretari PKR Sarawak Joshua Jabeng madahka sida nadai enda nerima perambu nya.
Ku iya penemu PH endang nyata sereta dekaka status tu dipulaika ngagai asal baka dalam Sempekat Malaysia 1963 (MA63).
“Sapit Menteri ba Opis Menteri (Pekara Sabah enggau Sarawak) Datuk Hanifah Hajar Taib nerangka pekara tu dalam parlimen kemari (Hari Tiga) kena mulaika reti leka jaku Nengeri-Nengeri Borneo ungkup Sabah enggau Sarawak.
“Kami nadai enda ngenggaika penemu tu lalu pia mega parti PH ke bukai, nya endang ti yang tetap deka dipejalaika bepelasarka sempekat asal MA63,” ku iya.
Berebak enggau nya, Ng berkata madahka iya udah mansik MA63 kenyau ari beberapa taun ke udah, lalu pengawa mulaika pemanah status Sabah enggau Sarawak nyadi Nengeri-Nengeri Borneo, endang patut amat.
“Mulaika pemanah status Sabah enggau Sarawak nyadi Nengeri-Nengeri Borneo baka ke asal dalam MA63 endang niat ati PH.
“Pekara tu udah diperambu maya PH megai perintah tang enda diterima Gabungan Parti Sarawak (GPS).
“Diatu perintah deka mulaika baru status tu lalunya beguna amat kena mulaika baru pemanah hak Sabah enggau Sarawak ti udah lenyau ari baruh MA63,” ku iya.