Anda di sini

Dagang temuai, pemansang pengelandik dikemeratka dalam PCDS 2030

Advertisement
Abang Johari beratika gambar ti dpadahka Jamilah ke dipandang ba Galeri Tok Nan dalam begunan CENTEXs kampus Lundu ke baru dipenyadi, seraya diperatika sida bukai - Gambar Penerangan
Abang Johari beratika gambar ti dpadahka Jamilah ke dipandang ba Galeri Tok Nan dalam begunan CENTEXs kampus Lundu ke baru dipenyadi, seraya diperatika sida bukai - Gambar Penerangan

KUCHING: Dagang temuai sereta pemansang pengelandik enggau inovasyen iya nya dua sektor ulih ngemansangka menua Lundu sereta Sematan.

Kepala Menteri Datuk Patinggi Tan Sri Abang  Johari Tun Openg madahka dua sektor tu mega dikemeratka dalam Strategi Pemansang 2030 Pengudah COVID-19 (PCDS 2030).

Abang Johari arap bendar sektor tauka industri tu ulih ngemajuka menua Lundu enggau Sematan nengah penumbuh Palan Penyulut Teknikal Sarawak (CENTEXS) Kampus Lundu.

"Program ba CENTEXS Lundu tu tebal agi bekaul enggau industri dagang temuai enggau hospitaliti. Hospitaliti tu nyengkaum F&B (Food & Beverage) enggau mega pengurusan hotel.

"Bisi pemeranak puku deka beranakka puku ditu ti bepelasarka industri hospitaliti nyengkaum hotel enggau medium hotel, tang  beguna mega 'homestay'," ku iya madah ngagai raban pengarang berita.

Abang Johari nyebut pekara tu ba aum pengarang berita Pengerami Bejadi Centexs Lundu sereta Pengerami Nyuaka Surat Pala Tanah Seksyen 18 Kanun Tanah enggau Pengerami Nyuaka Kunchi Rumah Permata Spektra Lundu enggau Sematan ke diatur ba CENTEXS Lundu di Lundu kemari.

"Anak kitai ditu enggau ari endur bukai di Sarawak , laban bisi hostel disediaka sida ulih belajar dalam bidang hospitaliti enggau nguruska homestay," ku iya seraya madah homestay iya nya siti ari pertumbuhan (growth) menua pesisir dalam sektor servis.

Dulu ari nya lebuh bejaku ba pengerami tu, Abang Johari ngenang dua sektor tu nyadika pelasar tauka platform ba menua Lundu engau Sematan.

Enti bekaul enggau dagang temhai kitai ulih nhena platform visual, media sereta kebukai mandangka rampa menua ke bisi ba Sarawak.

"Lalu udah tentu kitai deka kenorang ti pandai tauka bisi penau sereta inovatif. Tu mega ke disediaka ba CENTEXS Lundu. Ari tu impian Tok Nan ulih dikeamatka ungkup orang Lundu enggau Sematan," ku iya.

Kelimpah ari nya pekara ti diperambu penyandang Kunsil Nengeri (DUN) Tanjong Datu Datuk Amar Jamilah Anu ti minta bidang ngaga kereban dalam rumah sito ari bidang patut disediaka ba CENTEXS Lundu mega deka diperundingka.

Kebuah pia ku Abang johari laban bidang tu setipak enggau penyakah pemansang ti nyadi ba kandang menua Lundu enggau Sematan.

Berebak enggau tu iya meri puji ngagai CENTEX Lundu ke bisi nyendiaka latih nupi ikan ti ngemeran tauka bekenaka teknologi.

"Bidang akuakultur mega patut dipasukka ba CENTEXS tu," ku iya ngenang pekara tu ba aum oengarang berita.

Sama datai ba pengerami tu, Chairman CENTEXS Tan Sri Datuk Amar Mohamad Morshidi Abdul Ghani, penyandang DUN Tanjong Datu ti mega nyadi Chairman Komiti Pengatur Pengerami Bejadi CENTEXS Lundu Datuk Amar  Jamilah  Anu enggau sida ke bukai.

  • oleh
  • Advertisement