Anda di sini

Sarawak merambu numbuhka sebuah kompeni bilun mit 

Advertisement
Abang Johari beratika langkar gambar projek rayat Padang Bilun Baru Bebuling, Spaoh, Betong, kemari - Gambar Opis Pemadah.
Abang Johari beratika langkar gambar projek rayat Padang Bilun Baru Bebuling, Spaoh, Betong, kemari - Gambar Opis Pemadah.

KUCHING: Sebuah kompeni bilun mit diperambu ditumbuhka di Sarawak, ti dipelabaka ulih mantu nyungkak ekonomi nengeri.

Kepala Menteri Datuk Patinggi Tan Sri Abang Johari Tun Openg madah, kompeni bilun mit tu ari baruh Hornbill Skyways bisi bilun nyendiaka servis suwa ke mai kargo enggau temuai.

Iya madahka perambu tu ulih nyadi nyata enti Gabungan Parti Sarawak (GPS) diberi 'mandat' nyadi perintah maya pengawa bepilih nengeri ke-12.

"Nengah kompeni bilun mit tu semina mekuh ngagai hab ti strategik tauka beguna ba dagang temuai baka Singapura, Kuala Lumpur, Bangkok, Jakarta enggau Hong Kong.

"Kitai mai temuai (kitu) awakka enda bepanggai ba penerebai bukai, laban sida temuai tu deka agi terus ari siti endur ngagai siti endur, sida enggai singgah (transit).

"Suba bisi penanggul enti temuai ari Hong Kong (deka kitu) sida mansa Kuala Lumpur sereta ngisi pom, lalu maya datai di Sarawak sida ngisi pom baru. Enti terus (ari siti endur ke siti ) nyamai agi," ku iya.

Abang Johari mansutka pekara tu lebuh dirandau raban pengarang berita ba aum pengarang berita  Pengerami Nasih Tanah Padang Bilun Baru Bebuling, Spaoh di Bagi Menua Betong kemari.

Nerangka baru Abang Johari madah, tu semina ngena bilun ti ulih ngundan 100 ngagai 120 iku orang tambang, awakka temuai enda bepanggai ba kompeni penerebai bukai.

"Tu ukai jaku ngapa, aku udah ngira ungkus, chara nya enda kelalu nating belanja. Aku bisi model ari baruh Hornbill." ku iya ti dulu mantaika perambu tu maya bejaku ba Pengerami Nasih Tanah Padang Bilun Baru Bebuling, Spaoh.

Ba aum pengarang berita tu mega lebuh ti ngenang projek padang bilun tu, Abang Johari madahka tu projek ti strategik laban nya nyadi akses dagang ngagai pemansang ke udah nyadi ba bagi menua Betong enggau ke ngelingi.

Kandang menua tu bisi dua pengawa ekonomi ke pemadu beguna iya  nya betanam betupi enggau dagang temuai, ku iya.

"Bekaul enggau pengawa betanam, kandang endur ditu (Bagi Menua Betong) disebut nyadi bakul pemakai berindik ari tanah ditu ami endur betanam kelimpah ari nyadi palan pengeluar pemakai.

"Kelimpah ari betanam, ditu mega engkeman nyadi palan betupi ke bisi potensial ditu nyengkaum ba kebun salcra enggau sawit ke nyadi alai nupi chapi enggau kambin lalu palan endur nyayat mega bisi ditumbuhka.

"Kedua, iya nya dagang temuai laban semak enggau Batang Ai," ku iya seraya madahka projek ngaga Padang Bilun Bebuling, Spaoh nya dipelabaka tembu ba taun 2023.

Enti temuai ari Kuching ke Betong ngena penerebai, lalu ari Betong ke Batang Ai semina sejam aja ku iya, dibandingka enggau peneleba  maya nyadi menteri dagang temuai suba pejalai empat jam setengah, kelalu lama pejalai ba sida temuai.

Kelimpah ari strategik nyadi palan bakul pemakai, Bagi Menua Betong mega bisi Bukit Sadok ti engkeman nyadi palan  dagang temuai, ku iya.

"Kitai mega bisi ngaga padang bilun ti sama di Kapit enggau Lawas, kelimpah ari di Spaoh.

"Nengah penyambung tu, udah tentu deka mai pemanah ngagai ekonomi kitai," ku iya.

Berebak enggau tu lebuh dipinta ngenang Sarawak deka nyadi pengeksport pemakai, Abang Johari madahka, tu siti ari strategi timpuh panjai kitai laban Malaysia deka ke industri pemakai ti ulih ngenanka prestasi ti manah.

Di Sarawak ku iya, bisi ruang ke mayuh alai ngemansangka sektor betanam betupi nyengkaum bekenaka teknologi ke diatu ngemeratka  IoT kelimpah ari ngembuan gaya hari enggau ekosistem ti manah.

Ku iya, Sarawak nengah SADA bekerejasama enggau BERNAS ngeluarka padi ngena spesis baru ke meri pemanah jemah ila ari sukut betanam betupi.

"Tang siti ke pemadu beguna diatu iya nya nyengkaum di Thailand, di Thailand benung ngemansangka logistik, mesti dikemeratka.

"Padang bilun ke digaga kitai tu iya nya siti logistik ke dikena ngemansang sektor tu," ku iya.

Bisi datai ba pengerami tu, Sapit Kepala Menteri ti mega Menteri Betanam Betupi Moden, Tanah Adat enggau Pemansang Kandang Menua Datuk Amar Douglas Uggah Embas, Menteri Muda Perengka Pengangkut Datuk Dr Jerip Susil enggau ke bukai.

  • oleh
  • Advertisement