KUCHING: Chairman Gabungan Parti Sarawak (GPS) meri ulu lungga Dato Gerald Rentap (gambar) deka nyadi 'manuk sabung' ba sitak Kun sil Nengeri ( DUN) Layar maya Pengawa Bepilih Nengeri Ke-12 (PRN12) ti diatur kena 18 Disember 2021.
Rentap ke nyadi Ketuai Raban Nembiak Parti Pesaka Bumiputera Bersatu (PBB) mega nyadi penyandang Kunsil Nengeri (DUN) Layar.
Ba PRN 11, Rentap mujur ngetanka sitak DUN Layar ti sebedau tu kala diarika apai iya, Datuk Patinggi Tan Sri Alfred Jabu Numpang.
"YB deka terus nyadi Yang Berhormat, Dato Gerald Rentap Jabu 'manuk sabung' kitai ila," ku Abang Johari ti mega nyadi Presiden PBB ngelansa pekara nya.
Iya ti mega nyadi Kepala Menteri nyebut pekara nya lebuh bejaku ba Pengerami Nasih Tanah Padang Bilun Baru Bebuling, Spaoh di Bagi Menua Betong kemari.
Sebedau tu, Abang Johari kala madahka rintai nama chalun GPS ti bediri minta pilih ba PRN 12 deka dibantaika iya kena 4 Disember, iya nya dua hari sebedau pengawa ngantung nama, ti diatur kena 6 Disember.
Dulu ari nya ba jaku pengelalu, Sapit Presiden PBB Datuk Amar Douglas Uggah madahka 18 Disember ke deka datai nentuka kuing Sarawak jemah ila.
Sapit Kepala Menteri tu madah, Nengeri Sarawak beserakup segulai sejalai sereta tegap enggau mai pemansang ngagai rayat laban ngembuan ketuai ti bepeneleba, kemerah enggau rayat sereta nyadi kepala menteri semua rayat.
Uggah mai rayat Sarawak kelebih agi ba sitak Layar, Bukit Saban, Beting Maro enggau Saribas meri awak lima taun agi ngagai Abang Johari nyadi kepala menteri.
Iya arap amat empat DUN dalam Bagi Menua Betong iya nya DUN Layar, Bukit Saban enggau Saribas dalam Parlimen Betong sereta DUN Beting Maro dalam Parlimen Batang Lupar ulih pemujur ngagai PBB enggau GPS.
"Kami komited meri sukung penuh ngagai nuan (Datuk Patinggi Tan Sri Abang Johari).
"Kami deka gawa enggau bebendar, kami ukai kelalu andal tang laban empat sitak tu (Layar, bukit Saban, Beting Maro enggau Saribas) endang kubu kuat GPS.
"Kami deka meri sitak ngagai nuan kena malam 18 Disember tu, laban kami deka ke nuan terus nyadi ketuai kitai. Nuan siku ti ulih nyadi ketuai Sarawak jemah ila laban nuan bisi peneleba," ku Uggah.
Kelimpah ari Uggah ti nyadi penyandang DUN Bukit Saban, penyandang DUN Layar (Rentap), penyandang DUN Saribas Mohamad Razi Sitam enggau penyandang DUN Beting Maro, Razaili Gapor.