KUCHING: Parti Aspirasi Rakyat Sarawak (ASPIRASI) kemari mantaika nama 17 ari 20 chalun ti disahka deka bediri minta pilih ba Pengawa Bepilih Nengeri (PRN) Ke-12 kena 18 Disember tu ila.
Nama chalun nya dibantaika Chairman ASPIRASI Buln Ribos ba pengawa mit nyuaka surat chiri ari Presiden parti nya, Lina Soo ba sebuah hotel tebilang, ditu kemari.
Sida nya Lina Soo deka bediri minta pilih ba Kunsil Nengeri (DUN) Padungan, Chan Chee Hiong (Pending), Leong Shaow Tung (Batu Lintang), Tan Kok Chiang (Kota Sentosa), Fong Pau Teck (Batu Kawah), Buln Ribos (Serembu), Chong Siew Hung (Mambong), Simon Jangan (Kedup) enggau Jame Nyuking (Bukit Semuja).
Kelimpah ari nya, Wong Chin King ba kerusi Repok, Ngelayang Unau (Machan), Lau Kiu Ming (Bukit Assek), Josephine Lau Kiew Ping (Dudong), Loh Wui Ping (Pelawan), Chieng Lea Phing (Tanjong Batu), Hani Jaraee (Piasau) enggau Chin Fen Siong (Pujut).
Lina lebuh dirandau media madah, ASPIRASI deka mantaika nama chalun ke bukai udah tu ila tauka maya hari ngantung nama chalun.
“Kami deka madah ngagai kita rintai nama tu maya hari ngantung nama chalun.
“ Parti kami deka bediri minta pilih ba 20 kerusi DUN lalu fokus kami iya nya sitak ba kandang mengeri enggau sitak ti besemak enggau mengeri,” ku iya.
Ku iya baru, ba pengawa bepilih ke sekali tu, ASPIRASI mega bekerejasama enggau Parti Bansa Dayak Sarawak Baru (PBDSB) ambika bediri ba naka pemayuh ke ulih ba kerusi DUN.
“ Sida (PBDSB) deka bediri minta pilih ba kerusi Dayak enggau Orang Ulu di menua pesisir,” ku iya.
Dulu ari nya, Lina madahka juluk parti nya bediri minta pilih dalam PRN ke-12 iya nya awakka Sarawak tau meri nta diri lalu sida pechaya rayat Sarawak dekaka sada sida ke peng idup jemah ila didinga.
"Rayat Sarawak udah merinsa pengelama 58 taun ketegal federalisme di Malaysia lalu nya alai kami enggau napi 58 taun agi idup seranta serta dieksploitasi di nengeri tu, ku iya.
Berebak enggau nya,iya ngansak rayat Sarawak meri kuasa undi nengah chara milih chalun ASPIRASI nyadi pengari rayat di DUN.
“ Ambika sada kami negika hak Sarawak ulih didinga lalu ngapuska semua pemerinsa ti udah ditapi kitai ngelama tu,” ku iya.
Ditanya sekalika reti nya rayat Sarawak enda nerima juluk arti ti dekaka Sarawak merinta diri nyema ASPIRASI alah ba pengawa bepilih tu, Lina ngenadaika pekara nya.
“ Aku enda meda baka nya.Engka kami bedau chukup meri penyedar ngagai rayat,” ku iya.
Taja pia ku iya, agi bisi rayat, ambika chunto di kedai kupi enggau kaki lima masih bejaku pasal hak kena nentuka gaya nengeri tu jemah ila.
“Kami udah suah ngaga survei ba mensia mayuh lalu sida nyukung pengawa ditegika parti kami.
“ Nya alai, aku minta pengundi di Sarawak nyukung chalun ASPIRASI ba pengawa bepilih tu kena nentuka gaya pengidup sida jemah ila,” ku iya.
Parti ASPIRASI ditumbuhka niang ex-presiden parti nya, Datuk Dr Patau Rubis dalam taun 1996 ngena nama Parti Reformasi Sarawak (STAR) sebelum ditukar ngagai ASPIRASI taun siti nyin tadi.