Anda di sini

Tabung Pelajar Jawan, Luli Empaling kena meransang nembiak SK Nanga Assan nyulut dalam akademik

Advertisement
Jayum (tiga kanan) seraya dikemataka Alice (dua kanan) benung nyuaka insentif ari Tabung Pelajar Jawan enggau Luli Empaling ngagai penerima insentif nya di Sibu, kemari.
Jayum (tiga kanan) seraya dikemataka Alice (dua kanan) benung nyuaka insentif ari Tabung Pelajar Jawan enggau Luli Empaling ngagai penerima insentif nya di Sibu, kemari.

SIBU: Tabung Pelajar Jawan enggau Luli Empaling deka ditumbuhka kena meransang bala nembiak di Sekula Primari (SK) Nanga Assan.
Dato Ir Alice Jawan ti mega ari ruang bilik nya madahka, tabung nya ditumbuhka ba taun 2019 kena meransang nembiak sekula nya ngambika nyulut agi dalam pelajar sida.

"Tabung ti ditumbuhka tu meri peransang sereta pengeransing ngagai nembiak sekula di SK Nanga Assan tu. Enti ulih, kitai dekaka 13 buah rumah panjai di Nanga Assan tu ngadaka paling enda siku graduet sepintu," ku iya ditu, kemari.

Tabung tu ditumbuhka, ku iya, iya nya kena mantu nyungkak pelajar dalam bala anak di sekula tu.

Ku iya nerang, diatu mayuh macham chara kena nyekulaka anak ke renggat ti tinggi agi nyema betapi enggau penanggul belanja.

Tabung Pelajar Jawan enggau Luli Empaling udah ditumbuhka bala anak seduai iya nya Profesor Datuk Dr Jayum Jawan, Duta Besai Malaysia Ngagai Jepun Datuk Kennedy Jawan enggau Alice ti nyadika kelai basa ngagai apai indai sida ti endang ngemeratka pelajar.

Alice mega madahka, pengawa numbuhka tabung tu kena meransang sereta meri pengeransing ngagai nembiak di SK Nanga Assan ngambika bulih pemutus ti manah dalam pelajar sida sereta meri inpirasyen ngagai sida ngambika ulih mujur dalam pengawa sida jemah ila.

Beserimbai enggau tu, bisi enam iku nembiak ari SK Nanga Assan udah nerima insentif pelajar ari tabung tu ti udah disuaka Jayum ke nyadi pengari sida sebilik.

Bala nembiak tu iya nya Claira Vocyelle Dunminic, Hamsiah Ahmad, Jamadiel Adi, Prescilla Bujang, Nabilatul Zarra Jamilludin enggau Mohamad Radzi Yusuf ke bela nerima insentif mata duit ti udah diberi Profesor Datuk Dr Jayum Jawan ti ngarika sida sebilik.

Sida ti nerima tu iya nya nembiak ke udah bulih pemutus ti manah maya Ujian Penilaian Sekolah Rendah (IPSR) 2019 nyin kemari.

Sida sebilik ngarapka enggau meri insentif mata duit tu, ruang bilik bansa Iban di Nanga Assan diperansang ulih ngadaka pling enda siku graduet sepintu kena ngangkatka tikas sosioekonomi sida.

Advertisement