BINTULU: Perintah ti tegap sereta kering beguna amat kena ngatur nengeri ambika pemansang, pengawa ngulihka hak enggau matak pemeranak puku, ulih majak dipejalaika kelebih agi di Bintulu nyadi hab ekonomi ungkup nengeri enggau menua tu.
Menteri Utiliti Dato Sri Dr Stephen Rundi Utom (gambar) madah, pemujur (Barisan Nasional) menang 2/3 ba Pengawa Bepilih Nengeri (PRN) di Melaka,mandangka rayat dekaka pemerintah enggau sebuah perintah ti tegap.
Ku iya, semua orang meda nama utai ti dikeenggai rayat, rayat enggai meda bisi penyarut enggau gaya ti enda meruan ti ngujungka sida dekaka perintah ti kering.
"Kitai di Sarawak mega baka nya, dekaka perintah ti kering, tegap lalu kitai mesti beserakup gawa ngulihka," ku iya dalam jaku pengelalu iya ba Pengerami Makai Lemai Begulai enggau Rayat ba hotel tebilang ditu, malam ensana.
Iya madahka diri temegah ati enggau Kepala Menteri, Datuk Patinggi Tan Sri Abang Johari Tun Openg ti chakah gawa ngiga belanja kena nentuka Sarawak bisi pemansang belama.
"Kita meda kediri empu,berapa puluh iti jematan udah enggau benung digaga.
"GPS (Gabungan Parti Sarawak) ukai gempung sengapa.
"Kitai bisi penemu kediri,perambu kediri enggau ke bukai," ku iya.
Iya meri terima kasih ngagai iring Kepala Menteri ti manah sereta semampai bebatak asur nengah randau kena mutarka penanggul,kelebih agi dalam ruang bilik ti besai di nengeri tu.
Taja pia ku iya, parti politik tauka gerempung ti enda beratka pengelantang pendiau rayat sereta bisi agenda kediri empu, tetap enda ulih tan lama.
Ku iya,perintah seruran deka ngelantangka rayat sereta ngiarka agenda ti tau mai penyarut nyentuk ke kitai enda ulih fokus ngemansangka Sarawak.