Anda di sini

Anang ngasuh pisang bebuah dua kali, ku Abang Johari

Advertisement
Abang Johari (tiga kiba) nerima kad ari raban pengempu rumah fasa dua Projek Pengawa Berumah Rayat Permyjaya di Miri, kemari seraya dikemataka Reezal (dua kanan), Dr Sim (dua kiba) sereta bala bukai. - Gambar UKAS
Abang Johari (tiga kiba) nerima kad ari raban pengempu rumah fasa dua Projek Pengawa Berumah Rayat Permyjaya di Miri, kemari seraya dikemataka Reezal (dua kanan), Dr Sim (dua kiba) sereta bala bukai. - Gambar UKAS


MIRI: Kepala Menteri Datuk Patinggi Tan Sri Abang Johari Tun Openg kemari ngelalau rayat ngambika belajar ari nama ti udah nyadi 22 bulan Malaysia ari baruh pegai Pakatan Harapan (PH) ti udah ngetuka mayuh pemansang.

Ku iya, semanjai timpuh 22 bulan tu, nyau deka semua projek ti dilangkar lalu deka diepajalaika diketuka PH ti megai perintah besai maya nya.

Pia mega pengeransing Sarawak deka nyeruri sekula repuk enda nyadi nyata ketegal perintah besai ti nagih utang dulu enggau bayar RM1 bilion, tang pengudah nya projek ngangkatmanah ti disemaya nya enda dipejalai.

"Ungkup rayat di menua pesisir sereta ungkup (nyeruri) sekula repuk, Sarawak mayar RM1 bilion, pengudah nya enda digaga (nyeruri), ni enda aku asa ati. Nama ti nyadi 22 bulan, anang ngasuh pisang bebuah dua kali.

"Ingat nama ti nyadi. Tejuka kitai Sarawak nyaga Sarawak diri empu lalu kitai terus bekerejasama enggau perintah besai kena ngemansangka rayat di nengeri tu," ku iya.

Abang Johari ngelalau bekaul pekara nya lebuh ti bejaku maya ti bejadika pengerami nyain sempekat pemereti ati (MoU) entara Kompeni Perumahan Negara Berhad (SPNB) begulai enggau Kumpulan Syarikat Naim (NAIM) sereta pengerami nasih tanah Projek Pengawa Berumah Rayat Permyjaya Fasa 3, ditu kemari.

Sama bisi datai iya nya Menteri Pengawa Berumah enggau Kaunsil Kandang Menua Malaysia Dato' Sri Reezal Merican Naina Merican sereta Menteri Kaunsil Kandang Menua enggau Pengawa Berumah Sarawak Dato Sri Profesor Dr Sim Kui Hian.

Abang Johari ba jaku pengelalu iya mega nyemetak madahka Sarawak dekaka sebuah perintah ti tegap sereta sebela kena nyaga menua lalu pengudah nya mantu agenda pemansang nengeri tu.

Tang penyuah betukar perintah semina ngasuh rayat nyadi leju, nyentukka nyadi baka di Melaka.

"Rayt udah leju (enggau pengawa betukar perintah besai). Nyangka nya, Melaka nyadi bansa nya. Rayat dekaka  perintah ti meruan, nya alai (pengawa bepilih nengeri) Melaka tu nyadika lalau ngagai kitai," ku iya mesan.

Iya mega madahka iya nya rayat udah berengkah nulak 'pengawa katak' (ti betukar parti) lalu iya seraya ti betundi madahka diri lantang ati Sarawak nadai ngembuan mayuh 'katak' ke ulih ngeruga pengawa perintah nengeri mai pemansang ngagai rayat kelebih agi di kandang menua pesisir ti agi randaka mayuh perengkaguna pemun.

"Perintah nengeri Sarawak ti pemadu tegap naka ke diatu. Anang ngerusakka perintah kitai," ku iya.

Advertisement